Ауыл шаруашылығы министрлігі асыл тұқымды мал шаруашылығын дамытуды, мал шаруашылығы өнімінің өнімділігі мен сапасын арттыруды субсидиялау қағидаларына өзгерістер мен толықтырулар енгізді. Атап айтқанда, құжатта субсидия алушылар үшін қарсы міндеттемелер көрсетілген. Бұл туралы Ауыл шаруашылығы министрлігінің баспасөз қызметі хабарлады.
"2025 жылғы 1 қаңтардан бастап агроөнеркәсіптік кешен субъектілері үшін агроөнеркәсіптік кешеннің жалпы өнімінің (тауарларының немесе көрсетілетін қызметтерінің) ақшалай мәнде өсуін/сақталуын қамтамасыз етуді көздейтін қарсы міндеттемелер енгізілетін болады", - деп түсіндірді ведомствода.
Сондай-ақ, азықтық базасы әлсіз еліміздің құрғақ өңірлерінде: Атырау, Маңғыстау және Қызылорда облыстарында орналасқан, жыл бойы қорада ұстау технологиясын қолданатын сүт-тауар фермаларының аналық басы үшін ТЖ нормасы алынып тасталмақ. Оларды субсидиялау жергілікті бюджеттен қосымша бюджет қаражаты бөлінген кезде жүзеге асырылатын болады.
Бұдан басқа, субсидиялау процестерін цифрландыру және оңтайландыру шеңберінде тауар өндірушілерден қағаз түрінде талап етілетін құжаттар алынып тасталды.
Бұл ережелер 2024 жылдың 1 шілдесінен бастап күшіне енеді.
