ҚР Ауыл шаруашылығы министрлігінің болжамы бойынша Қазақстанда шегірткелердің таралу шыңы 2024 жылға келеді. Сонымен қатар, бюджеттен бөлінген қаражат зиянкестердің болжамды таралу аймағының тек 50% өңдеуге жеткілікті. Бұл туралы Ауыл шаруашылығы министрлігінің баспасөз қызметі хабарлады.
Республикалық фитосанитариялық диагностика және болжамдар әдістемелік орталығының деректері бойынша 2023-2024 жылдарға шегірткелердің таралуының 11-жылдық циклінің шыңы келеді. Келесі жылы табын шегірткелерінің 2,5 млн га аумаққа таралуы болжануда, бұл 2023 жылдан 1,5 есе жоғары (1,6 млн га). Табын шегірткелерінің ең көп таралуы Ақтөбе, Қостанай, Түркістан, Жамбыл облыстарында күтіледі.
Ауыл шаруашылығы вице-министрі Әбілқайыр Тамабектің мәліметінше, 2024 жылы бөлінген 4,2 млрд теңге қаражатқа болжамды көлемнің жартысын ғана өңдеуге болады. Сондай-ақ, арнайы бүріккіш техниканың көп мөлшері қажет. Пестицидтердің қолда бар қорларын ескере отырып, қосымша қаражат бөлу қажет.
"Көктемде кеш болмас үшін шегірткенің таралуына қарсы күреске дайындықты қазірден бастау керек. Ауыл шаруашылығы министрлігіне мемлекеттік сатып алуды уақтылы жүргізуді қоса алғанда, шегірткелерге қарсы қорғау іс-шараларын өткізуге сапалы дайындықты қамтамасыз ету қажет. Ал Қаржы министрлігі мен әкімдіктерге қорғаныс іс-шараларын ұйымдастыру үшін қосымша қаржы бөлінсін", - деп атап өтті ҚР вице-премьері Серік Жұманғарин.
