АШМ су астында қалған сібір жарасының көмілген орындарындағы жағдайды бақылауда

Ауыл шаруашылығы министрі Айдарбек Сапаров Республикалық штаб құрамында 10 қаңтарда ауқымды су тасқыны болып жатқан Батыс Қазақстан облысына барды. Өңірде сібір жарасының 3 көмілген орны су астында қалды. Бұл туралы АШМ баспасөз қызметі хабарлады.

"Бұл нысандардан ветеринарлық және медициналық мамандардан тұратын арнайы жұмыс топтары топырақ сынамаларын алды. Олар Республикалық ветеринариялық зертхананың облыстық филиалдарына және Ветеринария жөніндегі ұлттық референттік орталыққа жеткізілді. Барлық талдаулар теріс нәтиже көрсетеді, яғни топырақ үлгілерінде сібір жарасының споралары анықталмаған", - деп хабарлады баспасөз қызметі.

БҚО-ға сапар барысында Айдарбек Сапаров су тасқынынан зардап шеккен елді мекендердің тұрғындарымен, сондай-ақ фермерлермен кездесті. Министр су тасқынынан өлген ауыл шаруашылығы жануарларының иелеріне келтірілген залалды өтеу үшін қандай жұмыс жүргізіліп жатқанын түсіндірді.

"Жануарлар иелері залалды өтеу жөніндегі жергілікті комиссияларға өтінішпен жүгінуі керек, олар малдың жоғалу фактісін іске қосуы тиіс, осымен өтем алуға болады", - деп атап өтті Айдарбек Сапаров.

Сондай-ақ министр жергілікті жерлерде жұмыс жүргізіп жатқан республикалық эпизоотиялық жасақ филиалында қажетті қаражаттың бар екеніне көз жеткізу үшін өлген малды жою жөніндегі жұмыстардың барысын тексерді. Ол эпизоотиялық жағдайдың нашарлауына жол бермеу мақсатында жұмысты жандандыруды тапсырды.