АШМ АӨК жеңілдетілген қаржыландыру бағыттарын анықтады

Ауыл шаруашылығы министрлігі Агроөнеркәсіптік кешен саласындағы жобаларды несиелеу ережелеріне өзгерістер енгізді. Өзгерістер 12 бағыт бойынша жобаларды жеңілдетілген қаржыландыруды қамтиды, деп хабарлады ведомствоның баспасөз қызметі.

Басым бағыттардың қатарында-сүт-тауар фермаларын, ет бағытындағы құс фабрикаларын, ет мал шаруашылығы кәсіпорындарын, көкөніс қоймаларын құру жөніндегі жобалар бар.

Сондай-ақ заманауи су үнемдеу технологияларын пайдалана отырып, суармалы егіншілікті дамытуға, өнеркәсіптік жылыжай кешендерін, жеміс қоймаларын ашуға бағытталған ауыл шаруашылығы өндірушілеріне қолдау көрсетіледі. Балық өсіру және балық өңдеу кәсіпорындары, құс шаруашылығындағы асыл тұқымды репродукторлар, ауыл шаруашылығы өнімдерін, оның ішінде жүн мен теріні одан әрі терең өңдеу және сақтау кәсіпорындары, буып-түю материалдарын өндіру кәсіпорындары қолдау алады.

Кәсіпкерлер өз жобаларын 10 жылға дейін 2,5% жеңілдікті мөлшерлемемен несиелік қаражатқа іске асыра алады. Қарыздың ең көп сомасы -5 млрд теңгеге дейін, деп нақтылады АШМ-де.