АШМ 2030 жылға дейін АӨК дамыту тұжырымдамасын түзетеді

2030 жылға дейін АӨК дамыту тұжырымдамасына өзгерістер мен толықтырулар енгізіледі. Бұл туралы Қазақстан фермерлері қауымдастығының 20 жылдығына арналған республикалық конференция барысында АШМ баспасөз қызметі хабарлады.

Биылғы күз фермерлер үшін оңай емес. Оларды қолдау үшін бидайды нарықтық бағамен кепілдендірілген сатып алу қамтамасыз етіледі. Сондай-ақ Азық-түлік корпорациясының қорлары базасында тұқым қоры қалыптастырылады, субсидиялар бойынша борыштарды төлеу мәселесі пысықталады, тауар өндірушілердің несиелері мен қарыздарын ұзарту қамтамасыз етіледі.

"Бірақ бұл шаралардың өзі АӨК алдына қойылған міндеттерді орындау үшін жеткіліксіз екенін бәріміз түсінеміз. Сондықтан біз жеңілдетілген несиелеу мен лизинг көлемін және субсидиялау көлемін ұлғайту бойынша жұмыс істеп жатырмыз. Қазір АӨК-і дамытудың 2030 жылға дейінгі тұжырымдамасын түзету жұмыстары жүргізілуде. Қауымдастық мүшелерінен белсенді қатысуды сұраймын", - деді ҚР премьер-министрінің орынбасары Серік Жұманғарин.

Өз кезегінде ҚР Ауыл шаруашылығы министрі Айдарбек Сапаров енгізілетін түзетулердің бірнеше негізгі бағыттарын белгіледі.

Бірінші. Өсімдік шаруашылығында егіс алқаптарын әртараптандыру жұмыстары күшейтіледі - жоғары рентабельді дақылдарға көшеді және ылғал көп қажет ететін дақылдарды азайтады.

Екінші. Су үнемдеу технологиялары қолданылатын суармалы жерлердің ауданын жылына 150 мың гектарға дейін ұлғайту жөніндегі жұмыс күшейтіледі. Ол үшін суару техникасын қаржыландырудың арнайы бағдарламасы әзірленеді.

Үшінші. Машина-трактор паркін жаңарту үшін "Жасыл Даму" қаражатынан отандық өндірістің ауыл шаруашылығы техникасын лизингке сатып алуға 20 млрд теңге бөлінді. Тағы 20 млрд теңге жемшөп дайындау техникасы мен мобильді суару жүйелерін қаржыландыруға жұмсалады. Жалпы, "ҚазАгроҚаржы" арқылы ауыл шаруашылығы техникасының жеңілдікті лизингінің жыл сайынғы көлемі 170 млрд теңгеден асады. Министрлік жеңілдікті лизинг және ауыл шаруашылығы техникасын сатып алуды субсидиялау мақсаттарына қаржыландыруды ұлғайту бойынша жұмыс істеуде.

Төртінші. Ауыл шаруашылығы министрлігі тамақ және қайта өңдеу өнеркәсібін дамыту бойынша жеке кешенді жоспар әзірлейді. Оның шеңберінде республиканың импорт алмастыру әлеуеті мен экспортқа бағдарлануын, өңірлердің мамандануын, шикізат базасы мен логистиканың болуын ескере отырып, қолданыстағыларын жаңғыртады және жаңа қайта өңдеу өндірістерін құрады. Кешенді жоспардың негізгі мәселелерінің бірі ауыл шаруашылығы өнімдерін қайта өңдеу саласын қаржыландыру болады.

Айдарбек Сапаров сондай-ақ Қазақстан фермерлер қауымдастығы АӨК саласындағы ең ірі қоғамдық бірлестіктердің бірі болып табылатынын атап өтті. Ол 60 мыңнан астам шағын, орта және ірі тауар өндірушілердің мүдделерін білдіреді. Қауымдастықтың қолдауымен әр жылдары дағдарысқа қарсы шаралар қабылданып, ауыл шаруашылығы саласында салық салу жетілдірілді. Оның ішінде биылғы жылы Министрлік пен Қауымдастықтың бірлескен жұмысының арқасында Үкімет резервінен Жамбыл облысының зардап шеккен фермерлеріне қаржылық көмек ретінде 3,7 млрд теңге бөлінді.