Қазақстанда 2024 жылдан бастап етті мал шаруашылығында австралиялық тәжірибені енгізу бойынша жобалар іске асырылуда. Жемшөп дайындаудан бастап дайын өнімді сатуға дейін өнім өндірудің толық циклі бар ет кластерлері құрылады. Бұл туралы ҚР Ауыл шаруашылығы министрлігінің баспасөз қызметі хабарлады.
Австралиялық мал шаруашылығы әдісі жайылымдық жерлерді ұтымды, ротациялық пайдалануды, жемшөптің жануарларды ұстау орындарына жақындығын қамтамасыз етуді, құрама жем кәсіпорындарын құра отырып, бордақылау кезінде арнайы құрама жемді пайдалануды, сондай-ақ жаңа қайта өңдеу кәсіпорындарын жаңғыртуды және құруды көздейді.
Осы жұмыс аясында алдағы екі жылда 98 мың ірі қара малға арналған алты бордақылау алаңын, 50 мың ірі қара малға арналған ірі бордақылау кешенін және алғашқы мамандандырылған мал биржасын салу жоспарлануда.
АШМ деректері бойынша, 2024 жылы елде сою салмағында 430 мың тонна ІҚМ еті өндірілді, бұл 2023 жылмен салыстырғанда 7,5% - ға артық. Ет өндірісі 270 мың тоннаны құрады.
Бір жылда ІҚМ саны 18,5%-ға, 7,8 млн басқа дейін өсті. Бұл ретте мал басының 55%-ы агроқұрылымдарға тиесілі.
Етті мал шаруашылығын одан әрі дамыту мақсатында субсидиялау түрінде елеулі мемлекеттік қолдау жүзеге асырылады, оның жыл сайынғы көлемі шамамен 40 млрд теңгені құрайды. Етті мал шаруашылығы бойынша жобаларға жылдық 2,5% мөлшерлемемен жеңілдікті несие беру көзделген.
