Қазақстанда шегірткеге қарсы күреске 3,8 млрд теңге бөлінді

Қазақстанда табынды шегіртке зиянкестерімен күресуге биыл республикалық бюджеттен 3,8 млрд теңге бөлінді. Бұл туралы Ауыл шаруашылығы министрлігінің баспасөз қызметі хабарлады.

"Мамандардың болжамы бойынша шегіртке 1,6 млн га аумаққа таралуы мүмкін. Бүгінгі таңда 385,3 мың га алаңда пестицидтердің қажетті қоры қалыптастырылды", - деп хабарлады Ауыл шаруашылығы министрлігі.

Өңірлерде әкімдіктермен бірлесіп жедел штабтар құрылып, мониторинг және химиялық өңдеу жөніндегі жұмыс жоспары бекітілді.

Баспасөз қызметінің мәліметінше, бүгінгі таңда Түркістан облысында мароккалық шегіртке дернәсілдерінің көбеюі байқалды. Аймаққа пестицидтер толығымен жеткізілді. 8-9 сәуірде қорғау іс-шараларын өткізуді бастау жоспарлануда.

Басқа аймақтарда жерді химиялық өңдеу шегірткелердің таралу ошақтары анықталған кезде басталады. Көршілес мемлекеттермен шекаралас аумақтарда бірлескен зерттеулер жүргізілетін болады. Бұл туралы Қазақстан АШМ мамандары Ресей, Қытай және Өзбекстаннан келген әріптестерімен алдын ала келісті.