ҚР үкіметі Азық-түлік корпорациясына 2023 жылы форвардтық сатып алуды қаржыландыру үшін 70 млрд теңге бөлуді жоспарлап отыр. Бұл туралы үкімет отырысында Ауыл шаруашылығы министрі Ербол Қарашөкеев мәлімдеді.
"800 мың тонна көлемінде астықты форвардтық сатып алуды жүзеге асыру үшін Азық-түлік корпорациясының жарғылық капиталын ұлғайтуға республикалық бюджеттен 70 млрд теңге бөлу бойынша жұмыс жүргізілуде. Қаржыландырудың бұл түрі АӨК дамыту тұжырымдамасына енгізілген. Тұжырымдама жобасы ҚР Президенті әкімшілігіне келісуге бағытталды", - деді Ербол Қарашөкеев.
Айта кетейік, қазіргі уақытта Азық-түлік корпорациясы форвардтық сатып алуға 20 млрд теңге бөлді.
АШМ мәліметінше, 2022 жылы Азық-түлік корпорациясы 930 мың тонна бидай мен 10,5 мың тонна күнбағыс сатып алған. Ағымдағы жылы 230 мың тонна бидай мен 7,6 мың тонна күнбағыс сатып алу жоспарлануда.
Сонымен қатар, Ауыл шаруашылығы министрлігі тұрақтандыру қорларының жұмыс принципін олардың оңтайлы жүктелуі мақсатында қайта қарады. Әкімдіктер өңірлердің қажеттілігін өңірлік сұраныс негізінде халықтың үш айлық қажеттілігінің (қалалық және жалпы) 50% - на дейін айқындайтын болады. ӘКК ауыл шаруашылығы өндірушілерінен өнімді сату басталғанға дейін көкөністерді сақтау шартымен форвардтық сатып алуды жүзеге асырады.
"Әлеуметтік маңызы бар азық-түлік тауарларын өндірушілерге" айналым схемасын" қайта форматтау көзделуде, яғни қаржыландырудың 70% - ы ауыл шаруашылығы өндірушілері мен қайта өңдеу кәсіпорындарына бөлінетін болады. АШМ-нің тиісті бұйрығы қоғамдық талқылаудан өтіп, қауымдастыққа жолданды", - деді Ербол Қарашөкеев.
