Ауыл шаруашылығы өнімдерін қайта өңдеушілерге несие беруге 30 млрд теңге бөлінеді

Қазақстанда ауыл шаруашылығы өнімдерін өңдеумен айналысатын кәсіпорындарға жеңілдікпен несие берудің жаңа бағдарламасын іске қосу жоспарлануда. Бұл туралы ОКҚ брифингінде Ауыл шаруашылығы вице-министрі Ербол Тасжуреков мәлімдеді.

Биыл Қазақстан Үкіметі 2028 жылға дейін ауыл шаруашылығы өнімдерін қайта өңдеуді дамытудың кешенді жоспарын қабылдады.

"Жақын арада отандық шикізатты сатып алу үшін ауыл шаруашылығы өнімдерін қайта өңдеу кәсіпорындарына жылдық 5% жеңілдікпен несиелеудің жаңа бағдарламасы іске қосылады. Бүгінгі таңда осы мақсаттарға алғашқы 30 млрд теңге бөлу мәселесі пысықталуда", - деді Ербол Тасжүреков.

Оның айтуынша, 2025 жылы қаржы институттарын тікелей субсидиялау басталады, нәтижесінде ауыл шаруашылығы өндірушілері субсидия алу қажеттілігінсіз бірден арзандатылған несиелер алатын болады. Бұл бағыт қайта өңдеу кәсіпорындары үшін айналым қаражатын сатып алуға сынақтан өткізілетін болады.

Сонымен қатар, Солтүстік Қазақстан облысының оң тәжірибесін тарату бойынша жобаны іске асыру жалғасады.

"2023 жылы бұл мақсаттарға бюджеттен 100 млрд теңге бөлінді. Осының арқасында 11 өңірде 60 сүт-тауар фермасы салынуда. Бұл қосымша 373 тонна сүт өндіруді қамтамасыз етеді", - деп атап өтті вице-министр.

2025 жылға 122 инвестициялық жобаны жеңілдетілген қаржыландыруға 200 млрд теңге бағытталатын болады. Агроөнеркәсіптік кешендегі жобаларды қаржыландыруға қалған қаражатты Аграрлық несие корпорациясының, Қазақстанның Даму Банкінің және екінші деңгейдегі банктердің қаражаты есебінен алу жоспарлануда.