Ауыл шаруашылығы министрлігі 2025 және 2026 жылдар ішінде өсімдік шаруашылығын қадағалаудың ақпараттық жүйесін (ӨҚАЖ) әзірлеуді жүргізетін болады. Бұл туралы бүгін үкімет отырысында ауыл шаруашылығы министрі Айдарбек Сапаров мәлімдеді.
"Өсімдік шаруашылығы өнімдерінің қолданыстағы қадағалануы партияға ілеспе құжаттарды беру кезінде ғана пайда болады, бұл толық қадағалауды қамтымайды. Жаңа цифрлық жүйе ауыл шаруашылығы өнімдерінің өндірісі мен шығу циклін "даладан үстелге дейін" қағидаты бойынша қадағалауға, сондай-ақ өткізілетін өнімнің бақылауы мен қауіпсіздігін қамтамасыз етуге мүмкіндік береді", - деді Айдарбек Сапаров.
Сондай-ақ, Ауыл шаруашылығы министрлігі өсімдік шаруашылығы объектілерін - егіс алқаптарын, тарихи деректерді, өнімділікті, сақтау көлемін паспорттауды енгізуді жоспарлап отыр. Бұл өнімнің пайда болуының ашықтығын қамтамасыз етеді.
2025 жылдың басынан бастап Ақмола облысында жобаны техникалық сынақтан өткізу басталды. Айдарбек Сапаровтың айтуынша, жүйені толық көлемде іске қосу үшін шамамен 714 млн теңге бөлу қажет.
Сондай-ақ, Ауыл шаруашылығы министрлігінің басшысы бүгінгі таңда аграрлық секторды цифрландыру төрт ақпараттық жүйені қамтиды: субсидиялаудың бірыңғай мемлекеттік ақпараттық жүйесі (СБАЖ), ауыл шаруашылығы жануарларын бірдейлендіру (АБЖ), АӨК салаларын басқарудың бірыңғай автоматтандырылған жүйесі (ББАЖ, "e-Agriculture"), "Ауыл Аманаты" халыққа несие берудің ақпараттық жүйесі.
"АӨК цифрландырудың соңғы кезеңі бірыңғай цифрлық экожүйені құруды көздейтін "Е-АӨК" платформасын енгізу болады. Бірыңғай платформа шеңберінде ауыл шаруашылығындағы барлық ақпараттық жүйелерді біріктіру жоспарлануда. Бірыңғай цифрлық платформаны құру субсидиялау, ауыл шаруашылығы жерлерін басқару, өсімдік шаруашылығы мен мал шаруашылығының өзара байланысы арқылы қадағалаудың толық циклін қамтамасыз етеді", - деп қорытындылады Айдарбек Сапаров.
