Тоқаевқа МДТШ күнбағыстың жаңа будандарын таныстырды

ҚР Президенті Қасым-Жомарт Тоқаев Шығыс Қазақстан облысына сапары барысында "Майлы дақылдардың тәжірибелік шаруашылығы" элиталық тұқым шаруашылығына барды. Кәсіпорында Мемлекет басшысына көпжылдық практикалық және ғылыми-зерттеу қызметінің нәтижесінде өсірілген күнбағыс, соя және жаздық бидай сұрыптарының жаңа будандары көрсетілді. Бұл туралы Ақорданың баспасөз қызметі хабарлады.

МДТШ-да өндірілген тұқымдар отандық фермерлер арасында жоғары сұранысқа ие және Ресей Федерациясының жеті аймағына экспортталады.

Президент еліміздің басқа өңірлерінде майлы дақылдарды кеңейту перспективаларын сұрады. Кәсіпорын директоры Фарид Абитаевтың айтуынша, майлы дақылдарды егу алаңы жыл сайын 12-15% - ға артып келеді, нарықтағы сұраныс та жоғары болып қала береді.

Сонымен қатар, мықты жемшөп базасы мен сауатты селекциялық жұмыстың арқасында МДТШ сүт шаруашылығы саласындағы көшбасшылар қатарына енді. Бүгінгі таңда тауарлық-сүт фермаларында 3 мыңға жуық ірі қара, негізінен голштин-фриз тұқымы бар. Тәуліктік сүт өндірісі шамамен 40 тоннаға жетеді. Сүт төрт отандық сүт өңдеу зауытына жеткізіледі.

Сондай-ақ президентке Д.Серікбаев атындағы Шығыс Қазақстан техникалық университетімен серіктестікте жабдықталған оқу кабинеті көрсетілді. Мұнда жұмысшылар өндірістен қол үзбей агроменеджемент бойынша білім алады. Өсімдіктерді қорғау құралдарын өндіру саласындағы көшбасшылардың бірі швейцариялық Syngenta компаниясымен және американдық ауыл шаруашылығы техникасын өндіруші John Deere компаниясымен ынтымақтастық жолға қойылуда.

Қасым-Жомарт Тоқаев кәсіпорынның жетістіктеріне оң баға беріп, еліміздің басқа өңірлеріндегі тәжірибесін кеңейтуге шақырды.