Қазақстанда астық және майлы дақылдарды өңдейтін жаңа зауыттар іске қосылады

Қазақстанға өсімдік шаруашылығында терең өңделген өнімдерді: макарон, ұн кондитерлік өнімдерін, крахмал өнімдерін өндіруге көшу қажет. Бұл туралы үкімет отырысында ауыл шаруашылығы министрі Айдарбек Сапаров мәлімдеді.

Оның айтуынша, 2024-2026 жылдары астық өңдеу бойынша 13 жобаны іске асыру жоспарлануда. Ағымдағы жылы "Тирияки Агро" түрік компаниясы катарлық "Хасад Фуд" компаниясымен бірлесіп Астанада қуаттылығы 240 мың тонна астықты терең өңдеу бойынша құны 400 млн доллар жобаны іске асыруды бастады.

Қостанай облысында қазақстандық "Қостанай Грейн Индастри" компаниясы қуаттылығы 330 мың тонна құны 50 млрд теңге астықты терең өңдеу жобасын іске асыруды бастады.

Түркістан облысында "Қазқрахмал" компаниясы қуаттылығы 150 мың тонна инвестиция көлемі 35 млрд теңге болатын крахмал өнімдерін өндіру үшін жүгеріні қайта өңдеу жобасын іске асыруда.

"Крахмал, глютен, глюкоза-фруктоза шәрбаты, лизин, биоэтанол түріндегі соңғы өнімдерді әлемдік нарықтарға экспорттау жоспарлануда", - деді Айдарбек Сапаров.

Оның айтуынша, майлы дақылдарды өңдеу қарқынды дамып келеді. Өсімдік майын өндіруге 80 кәсіпорын жұмылдырылды, олар 2023 жылы 672 мың тонна өнім өндірді: 2022 жылмен салыстырғанда 4,3% - ға артық (644 мың тонна.). Ішкі нарықтың қамтамасыз етілуі 183% құрайды.

"Жыл соңына дейін өндірісті 750 мың тоннаға дейін ұлғайту болжанып отыр. Бұған егіс алқаптарын кеңейту, шикізат сатып алуға айналым қаражатын беру және жаңа инвестициялық жобаларды іске асыру есебінен қол жеткізілетін болады. Мысалы, ағымдағы жылы Солтүстік Қазақстан және Шығыс Қазақстан облыстарында жалпы қуаттылығы 100 мың тонна болатын үш жобаны іске асыру басталды", т- деді Ауыл шаруашылығы министрлігінің басшысы.

Ол жобалардың рентабельділігін арттыру мақсатында күнжара мен жом түріндегі дайын және жанама өнімдерді өткізу үшін Қытай нарығы ашылғанын атап өтті.