Алматы облысында желтоқсан айында жаңа ет комбинаты іске қосылады

Алматы облысы Кеген ауданы Тасашы ауылында қуаттылығы жылына 3 мың тонна ет өңдейтін "Кеген ЕтӨнеркәсіп" ет өңдеу зауытының құрылысы жүріп жатыр. Өндіріс 2024 жылдың желтоқсанында пайдалануға беріледі. Бұл туралы Ауыл шаруашылығы министрлігінің баспасөз қызметі хабарлады.

Жобаның құны 2,5 млрд теңгені құрайды. Зауыттың өндірістік қуаты ауысымына 40 бас ІҚМ, 150 бас ҰММ және 10 жылқы союға есептелген.

"Малды Кеген және Райымбек аудандарының тұрғындарынан нарықтық бағамен сатып алатын болады. Ет комбинатын өз шикізатымен үздіксіз қамтамасыз ету үшін өз бордақылау алаңдарын ашу жоспарлануда", - деп ақпараттандырды Ауыл шаруашылығы министрлігінен.

Шұжық цехының қуаты 1,5 тонна шұжық өнімдерін, консерві зауытының қуаты - ауысымына 1000 банка өнімді құрайды.

Толық қуатқа шығатын ет комбинаты жылына 3 мың тоннаға дейін ет өңдеп, 331,5 тонна шұжық өнімдерін, 66 тонна ет консервілерін шығаратын болады.