Қазақстан мен Қытай АӨК технологияларын пайдаланудағы ынтымақтастық туралы келісті

Қазақстан мен Қытай шегірткелерге, басқа да зиянкестерге, өсімдік аурулары мен арамшөптерге қарсы, оның ішінде ұшқышсыз ұшу аппараттарын пайдалана отырып, қорғау іс-шараларын жүргізу кезінде заманауи технологияларды пайдалану мәселелері бойынша өзара ынтымақтастық туралы уағдаласты. Бұл туралы ҚР Ауыл шаруашылығы вице-министрі Әбілқайыр Тамабектің Шыңжаң-Ұйғыр автономиялық ауданы (ШҰАА) Халық Үкіметі төрағасының орынбасары Мардан мұқиятпен кездесуінде айтылды, деп хабарлады ҚР Ауыл шаруашылығы министрлігінің баспасөз қызметі.

Ведомствоның мәліметінше, қазақстандық делегация ШҰАА-ға сапармен барды. Сондай-ақ, қытайлық әріптестермен кездесуде қазақстандық ауыл шаруашылығы өнімдерінің ҚХР-ға экспорты көлемін ұлғайту және ассортиментін кеңейту, қытайлық компаниялардың Қазақстандағы аграрлық сектор өндірісін дамытуға инвестицияларын тарту мәселелері талқыланды.

Келіссөздер қорытындысы бойынша ҚР Ауыл шаруашылығы министрлігі мен Шыңжаң-Ұйғыр автономиялық ауданының Халық Үкіметі арасында аграрлық-техникалық және сауда-экономикалық ынтымақтастықта өзара түсіністік туралы Меморандумға қол қойылды. Сондай-ақ, тараптар ауыл шаруашылығында пайдалану кезінде ұшқышсыз ұшу аппараттарын стандарттау және метрология саласындағы ынтымақтастықты нығайту туралы Келісімге қол қойды.

Сонымен қатар, қазақстандық делегация ШҰАА Халық Үкіметіне ауыл шаруашылығы саласындағы өзара сауда-экономикалық ынтымақтастықты арттыру жөніндегі Жол картасын әзірлеу үшін бірлескен жұмыс тобын құруды ұсынды.