Оңтайлы ылғал қоры осы көктемде Қазақстанда байқалуда

Қазақстанның оңтүстік өңірлерінде егіс жұмыстары жүргізілуде, 1,5 млн га егілді. Жаппай егу науқаны мамырдың екінші онкүндігінде басталады. Егіс үшін жағдайлар қолайлы. Бұл туралы Үкімет отырысында ауыл шаруашылығы министрі Айдарбек Сапаров мәлімдеді.

"Қазгидрометтің" болжамды деректеріне сәйкес Республиканың үлкен аумағында ылғал қоры оңтайлы. Сондай-ақ, фермерлер ылғалды жабу бойынша жұмыстар жүргізуде: 15,8 млн га немесе 89% өңделді", - деді Ауыл шаруашылығы министрлігінің басшысы.

Ведомствоның мәліметінше, ағымдағы жылы жалпы егіс алқабы 23,8 млн га құрайды.

Егістерді әртараптандыру шеңберінде бидай алқаптары өткен жылмен салыстырғанда 426 мың гектарға қысқарып, 13,3 млн гектарды құрайды (2023 жылы – 13,7 млн гектар). Майлы дақылдар алқабы 373 мың гектарға, жемшөп дақылдары - 66 мың гектарға ұлғаяды.

Сондай-ақ, суды көп қажет ететін дақылдарды азайту бойынша жұмыстар жүргізілуде. Мақта алқаптарының 16 мың гектарға (116 мыңнан 100 мың гектарға дейін), күріштің - 12 мың гектарға (100,3 мыңнан 88,3 мыңға дейін) азаюы болжануда.

Тұқымға деген қажеттілік 2,4 млн тоннаны құрайды, оның 99%-ы бүгінгі күнге дейін егілген. Қалған көлем Азық-түлік корпорациясының резерві есебінен қамтамасыз етіледі.

Сонымен қатар, Айдарбек Сапаров минералды тыңайтқыштарды жөнелтудің төмен қарқынын атап өтті. Ағымдағы жылға жоспар бойынша 1,5 млн тонна, оның ішінде отандық өндірістегі 900 мың тонна тыңайтқыш, бүгінгі таңда аграрларға барлығы 453 мың тонна немесе 30% жөнелтілді.

"Бұл бағыттағы жұмыс тек Қызылорда облысында ғана аяқталды. Қалған әкімдіктерге жұмысты жеделдету қажет. Сонымен бірге тыңайтқыш өндірушілермен бөліп төлеу мәселесі пысықталды. Әкімдіктер зауыттармен барлық мәселелерді тікелей пысықтап, аграрлармен тиісті жұмыстар жүргізуі тиіс. Сондай-ақ Олжас Абайұлы, Сізден өнеркәсіп министрлігіне ішкі нарықты қажетті көлемде тыңайтқыштармен басым қамтамасыз ету жөнінде шаралар қабылдауды тапсыруыңызды сұраймыз және осыдан кейін ғана экспортқа жөнелтуіңізді сұраймыз", - деп өтініш білдірді Айдарбек Сапаров премьер-министрге.