Қазақстанда күріш қабығын қайта өңдеу іске қосылды

Қазақстанда күріш қабығынан жасалған кремний көміртекті нанокомпозит өндірісінің бірінші кезегі іске қосылды. Жобаны Ғылым қорының қолдауымен ҚР Минералдық шикізатты кешенді өңдеу жөніндегі ұлттық орталық іске асырады. Бұл туралы Ғылым және жоғары білім министрлігінде хабарлады.

Өндіріс қуаты жылына 1500 тонна көпфункционалды кремний көміртекті материалды құрайды. Өндіріс барысында күріш өндірісінің қалдықтары болып табылатын күріш қабығын пайдаланады.

"Күріш массасының 20% құрайтын күріш қабығы маңызды элементтердің - көміртегі мен кремнийдің болуына байланысты жаңартылатын шикізат болып табылады. Осы материалдың табиғи артықшылықтарын пайдалана отырып, біз көпфункционалды кремний көміртекті нанокомпозитті алу үшін қайта өңдеу технологиясын әзірледік. Бұл материалды резеңке және үйкеліс материалдары үшін толтырғыш ретінде, сондай-ақ кремний мен ферроқорытпа үшін шикізат ретінде пайдалануға болады. Сонымен қатар, оны ауыл шаруашылығында қолдануға болады", - деді Ғылым қоры Басқарма төрағасының орынбасары Юрий Сухарников.