Қытайлық Peng Sheng компаниясы (Group) Co., Ltd Түркістан облысында мақта саласын дамыту жөніндегі жобаны іске асыруды жоспарлап отыр. Оған мақта өсіру және терең өңдеу және тоқыма фабрикасының құрылысы кіреді. Бұл туралы облыс әкімдігінің баспасөз қызметі хабарлады.
Компания өкілдерімен алдағы ынтымақтастықты Түркістан облысының әкімі Дархан Сатыбалды талқылады.
"Біз мақта өсіруге ғана емес, оны терең өңдеуге де басымдық береміз. Мақта тұқымы мен сапасын жақсарту, жаңа технологияларды енгізу, мақтаны терең өңдеу, тоқыма фабрикасын салу бойынша жұмыстарды орындау кезінде ғана мақта шаруашылығы мәселелері шешіледі. Сондықтан біз сіздермен ынтымақтасуға дайынбыз. Жол картасын әзірлеп, екі тараптың да міндеттемелерін әзірлейміз. Инфрақұрылым және басқа да мәселелерді шешу бойынша біздің тарапымыздан толық қолдау болады, - деді Дархан Сатыбалды.
Peng Sheng(Group) Co., Ltd өкілі Сонг Шицзие 10 мың гектар мақта алқаптарына тамшылатып суару технологиясын енгізуге дайын екенін айтты. Ол сондай-ақ мақтаны терең өңдеу, мақта майын шығару бойынша жабдықтарды әкелу жоспарлары туралы баяндады. Инвестор жоғары сапалы мақта тұқымын себуді және мақта зауытын салуды жоспарлап отыр.
