Солтүстік Қазақстанда суармалы жер алқаптары ұлғайтылады

Солтүстік Қазақстан облысында 2024 жылы су үнемдеу технологияларын қолдана отырып, жоспарланып отырған суару алаңы 9,4 мың гектарды құрайды, оның ішінде жаңбырлатып суару 8,2 мың гектарды және тамшылатып суару – 1,2 мың гектарды құрайды. Бұл туралы өңірдің Ауыл шаруашылығы және жер қатынастары басқармасынан хабарлады.

Аймақтағы негізгі дақылдар дәнді дақылдар, картоп, көкөністер және жемшөп болып табылады.

Биылғы жылы 4,6 мың гектар аумақта суару бойынша инвестициялық жобаларды енгізу жоспарлануда. Бұл жұмысты "Константиновка", "Явленское МТС", "Зенченко и К", "Сервис Жарс", АЗКО, Asyl Farms компаниялары жүргізеді.

Облыс бойынша барлығы 73-тен астам жаңбырлатқыш машина бар, оның ішінде 2023 жылы 20 бірлік, тамшылатып суаратын 12 бірлік сатып алынды. Қазіргі заманғы жаңбырлатқыштарда автоматты жүріс және суару датчиктері бар.

"Су үнемдеу технологияларын қолдана отырып, суармалы жерлерді ұлғайту жұмыстары жалғасуда", - деп атап өтті Ауыл шаруашылығы басқармасында.