Мәжіліс Парламент депутаттары әзірлеген жайылымдарды пайдалану мәселелері жөніндегі заңға енгізілген түзетулерді мақұлдады. Өзгерістер халықтың мұқтажы үшін жайылым тапшылығы проблемаларын шешуге, пайдаланылмайтын жайылымдарды қайтаруға ықпал ететін болады, сондай-ақ құжатта жер беру тәртібі жүйеленген.
"Қазақстанда жайылым 184 млн га жерді алып жатыр, бұл барлық ауыл шаруашылығы алқаптарының 84% құрайды. Жайылым алаңы бойынша Қазақстан әлемде бесінші орында, бұл республиканың мал шаруашылығы өнімдерін ірі өндіруші және экспорттаушы болуына мүмкіндік береді", - деді депутат Нұржан Әшімбетов.
Заң жобасында жайылымдардың жүктелу өлшемшарттары күшейтіледі. Қазіргі 20% орнына 50% - дан аз жүктелген жерлер алынуға жатады. АШМ есептеулері бойынша заң жобасын қабылдаумен 20 млн гектарға жуық жайылымдық жерлер қайтарылуы мүмкін, деп атап өтті Нұржан Әшімбетов.
Сондай-ақ, жайылымдарды конкурссыз беру нормасы алынып тасталады. Бұл ретте конкурстар өткізу және ауылдық округтің мұқтажы үшін жерді резервке қою тек бекітілген жоспарларға сәйкес жүргізілетін болады.
Елді мекендердің айналасындағы жерлердің мәртебесін күшейту үшін "қоғамдық жайылымдар" ұғымы енгізіледі. Қоғамдық жайылымдарды ауыл шаруашылығы алқаптарының басқа түрлеріне ауыстыруға тыйым салу белгіленеді.
Бұдан басқа, облыс әкімдіктері жайылымдардың деградациясына қарсы күрес бойынша іс-шаралар әзірлейді. Фермерлер жайылымдарды суландыру, оларды түбегейлі және үстірт жақсарту шығындарын субсидиялау түрінде мемлекеттік қолдауға ие болады. Сондай-ақ, қоғамдық жайылымдарды қалпына келтіру жұмыстарын қаржыландыру көзделетін болады.
