Ағымдағы жылы егіс жұмыстарын жеңілдетілген несиелендіруге Аграрлық несие корпорациясы арқылы 140 млрд теңге және Азық - түлік корпорациясының форвардтық сатып алуы арқылы 40 млрд теңге бағытталады. Қаржыландыру тапшылығы бұл ретте 1,3 трлн теңге көлемінде қалатынын ескере отырып, Ауыл шаруашылығы министрлігі коммерциялық ұйымдар беретін несиелердің сыйақы мөлшерлемесін субсидиялау арқылы қосымша қаражат тарту тетігін пысықтады. Бұл туралы Ауыл шаруашылығы министрлігінің баспасөз қызметі хабарлады.

"Мемлекет басшысының тапсырмасы бойынша көктемгі егіс жұмыстарына несиелер бойынша пайыздық мөлшерлемені субсидиялауға қаражат бөлу есебінен қосымша 400 млрд теңгеге дейін тартылатын болады. Осы мақсаттар үшін үкімет резервінен 60 млрд теңге бөлінетін болады, олар тартылған қарыздарды арзандатуға, сондай-ақ ауыл шаруашылығы өндірушілерінің қарыздарына кепілдік беру мақсаттарына бағытталатын болады", - деп түсіндірді АШМ-де.

Бұл тәсіл фермерлерге егіс жұмыстарын жүргізуге жылдық 5% - бен несие қаражатын бірден беруге және жеткілікті кепілдік қамтамасыз етілмеген жағдайда қарыз сомасының 85%-на дейін кепілдік ұсынуға мүмкіндік береді.

Ереженің жобасы бүгін әкімдіктер мен орталық мемлекеттік органдарға келісуге бағытталатын болады.

Бұдан басқа, Азық-түлік корпорациясы егістікті қосымша қаржыландыру үшін 200 мың тонна астыққа арналған тауарлық несие бағдарламасын іске асыруды бастады.