Ұн тартушыларға астық жеткізу қол режимінде реттелетін болады

"ҚТЖ" ұлттық компаниясы Азық-түлік корпорациясымен, Ауыл шаруашылығы министрлігімен және өңірлердің ұн тарту операторларымен бірлесіп арзандатылған қазақстандық және импорттық ресейлік астықты ұн тарту кәсіпорындарына жеткізуді жедел қолмен реттеу үшін күн сайын селекторлық кеңестер өткізетін болады. Мұндай шешім вице-премьер Серік Жұманғариннің төрағалығымен үкіметте өткен әлеуметтік азық-түлік бағасын тұрақтандыру жөніндегі кезекті кеңесте қабылданды.

Сауда министрлігінің мәліметінше, 20 қазанда арзандатылған астықты жеткізуге меморандумға 16 өңір қол қойған, астық пен ұнды әкетуді 12 облыс жүзеге асырады.

"Азық-түлік корпорациясымен қол қойған 16 өңірдің меморандумдарынан Солтүстік Қазақстан облысы әлі күнге дейін ұн тарту операторын анықтаған жоқ, жеткізу шартына қол қойған жоқ және төлем жасаған жоқ. Алматы және Ұлытау облыстары төлем жасаған жоқ, соның салдарынан ұн тартатын кәсіпорындарға астық жеткізу кешіктіріліп жатыр",-деді СИМ Сауда комитетінің төрағасы Айдар Әбілдабеков.

Ресейлік астық импортына келетін болсақ, ҚТЖ деректері бойынша ұн тартатын кәсіпорындар қазан айында 274 мың тонна астық әкелуге өтінім берді, бірақ 20 қазанда іс жүзінде 57 мың тонна ғана келіп түсті. Негізгі себеп - ұн тартатын кәсіпорындар тарапынан астық үшін уақтылы төлемнің болмауы. Қыркүйек айында импорттық бидайды әкелу көлемі 107 мың тоннаны құрады.

Ресейлік бидай қазақстандық кәсіпорындарға ұн мен макарон өнімдерін өндіру үшін қажет. Өңірлердегі әрбір ұн тартушы оператормен жеткізуде туындайтын қиындықтарды шешу үшін мемлекеттік органдар мен ұлттық теміржол операторы күн сайын әлеуметтік өнімдерді кәсіпорындарға жеткізу схемасын пысықтайтын болады.

"Келесі кездесуде біз астық пен ұнды жеткізуді басқарудың қол режимінің нәтижелерін көруіміз керек. Ең алдымен, бұл ұн бағасының өсу үрдісін төмендету. Дәл осындай жұмысты күн сайын қол режимінде өңірлердегі әкімдіктер өсу серпінін көрсететін барлық әлеуметтік өнімдерді өндірушілермен және жеткізушілермен жүргізуі керек", - деп атап өтті Кеңес қорытындысы бойынша Серік Жұманғарин.