Сапаров ет бағасының өсуін түсіндірді

Сиыр етіне бағаның өсуі көрші мемлекеттер тарапынан қазақстандық малға сұраныстың артуымен байланысты. Бұл ретте ішкі нарық үшін фермерлерден мал сатып алатын делдалдар ет бағасын көтерді. Бұл туралы ауыл шаруашылығы министрі Айдарбек Сапаров үкіметте өткен брифингте мәлімдеді.

"Еттің құнына Тәжікстан, Өзбекстан тарапынан сұраныс әсер етті. Бізде 80 мың ІҚМ әкетуге квота енгізілді, өңірлер бойынша малды белсенді түрде сатып ала бастады. Осы кезде біздің делдалдар қосылып, базарларда бағаны көтере бастады", - деді Айдарбек Сапаров.

Оның айтуынша, бүгінгі күні бұқашықтарды әкетуге квота таусылды, келесі квота енгізілгенге дейін 2-3 ай өтеді, ал әзірге малды әкету тоқтатылады. Сонымен қатар, ҚР-дағы көтерме ет нарығындағы жағдай тұрақтанды.

"Көтерме бағалар бір килограмға 1100-1300 теңге болды. Малды Тәжікстан мен Өзбекстан белсенді сатып ала бастаған кейбір жерлерде баға 1500 теңгеге дейін көтерілді. Қазір ол килограмына 1300-1350 теңгеге дейін төмендеді", - деді Айдарбек Сапаров.

Оның айтуынша, бүгінгі таңда ет бағасы бір килограмы 2700-ден 3300 теңгеге дейін, кей жерлерде 3500 теңгеге дейін жетеді.

Елде ет тапшылығы жоқ. Малды қыстауға арналған жем жеткілікті мөлшерде дайындалды, сонымен қатар жем бағасы төмендеді. Өткен жылы аграрлар жоғары өнім жинады, ал жемдік астықтың құны тоннасына 50 мың теңгеге дейін төмендеді.

Бөлшек саудадағы ет бағасының өсуіне келетін болсақ, делдалдар тізбегін және сауда үстемесінің сақталуын бақылай отырып, Сауда министрлігі мұны талқылауы керек. Ауыл шаруашылығы министрлігі бұл мәселені Сауда министрлігіндегі әріптестерімен қосымша талқылауға ниетті.

"Ауыл шаруашылығы министрлігінің міндеті - өндіру, ал үстемеақы мен шекті бағаларды сауда департаменті қадағалап отыруы тиіс. Бұл олардың жұмысы. Аймақтарды да қарауы керек. Сондықтан Сауда министрлігімен бірге біз бұл мәселені тағы да талқылап, жоспар әзірлейміз", - деп қорытындылады Айдарбек Сапаров.