Ауыл шаруашылығы министрлігі құрғақшылықтан келтірілген зиянды өтеу ережелерін әзірледі

Жамбыл облысының фермерлеріне құрғақшылық пен суармалы су тапшылығы салдарынан егіннің жоғалуы үшін залал өтеледі. Ол үшін өңірде табиғи сипаттағы төтенше жағдай жарияланды. Өтемақы төлеуге қаражат Үкімет резервінен бөлінетін болады.

Ауыл шаруашылығы министрлігі "Ашық НҚА" порталында "Табиғи сипаттағы төтенше жағдай салдарынан агроөнеркәсіптік кешен субъектілеріне келтірілген залалды өтеу қағидаларын бекіту туралы" бұйрықтың жобасын орналастырды. Келтірілген залалдың мөлшерін құрамына жергілікті атқарушы органдардың (оның ішінде аудандық және қалалық), прокуратура органдарының, сыбайлас жемқорлыққа қарсы іс-қимыл жөніндегі, қоғамдық ұйымдардың, "Атамекен" өңірлік кәсіпкерлер палатасының өкілдері кіретін комиссия айқындайды деп болжанады.

Әзірленген қағидаларға сәйкес, өңірде ТЖ жарияланғаннан кейін жергілікті атқарушы орган бір ай ішінде өзінің интернет-ресурсында зардап шеккен ауыл шаруашылығы өндірушілерінен залалды өтеуге өтінімдерді қабылдау туралы хабарландыруды орналастырады.

Комиссия мүшелері жер учаскелерін тексеруді және зардап шеккен егістіктерді тексеруді жүзеге асырады. Тексеру фермердің қатысуымен жүргізіледі және нәтижелері бойынша растайтын фотосуреттер мен бейнематериалдарды міндетті түрде қоса бере отырып акт ресімделеді.

Зиян ауыл шаруашылығы және өсімдік шаруашылығы ғылыми-зерттеу институтымен келісілген өңдеудің технологиялық картасына сәйкес бір гектарға нақты ауыл шаруашылығы дақылын өсіруге жұмсалатын шығыстар негізге алына отырып айқындалады. Бұл карта жаңбырлы және суармалы егістіктерге бөлек жасалады.

Егер ауыл шаруашылығы өндірушісі субсидия алушы болып табылса, онда залал мөлшері алынған субсидиялар сомасын шегергенде айқындалады.

Егістерді тексеру қорытындысы бойынша комиссия зардап шеккен АӨК субъектілерінің тізбесін қалыптастырады. Ал жұмыс органы бекітілген жиынтық тізбені ҚР Үкіметінің резервінен ақша бөлу үшін азаматтық қорғау саласындағы уәкілетті органға жібереді.