Азық-түлік корпорациясы жақын арада астықты тікелей сатып алу бағасын жариялайды. Бұл мақсатқа үкімет резервінен 10 млрд теңге бөлінеді, деп хабарлады Ауыл шаруашылығы министрлігінің баспасөз қызметі.
Ауыл шаруашылығы министрі Айдарбек Сапаров Мәжілістің Аграрлық мәселелер жөніндегі комитетінің кеңейтілген отырысында шағын шаруашылықтардан сатып алудың басымдылығын белгілей отырып, жаңа егіннің астығын тікелей сатып алуды ұйымдастыру туралы мәселе пысықталып жатқанын хабарлады.
"Үкімет резервінен 10 млрд теңге бөлу жоспарлануда. Бұл шара нарықты тұрақтандыруға және нарықтық құны бойынша 155 мың тонна астық сатып алуға мүмкіндік береді. 1 млн тоннаға жуық ауқымды сатып алу үшін 75 млрд теңге көлемінде қосымша қаржыландыру қажет", - деді Айдарбек Сапаров.
Астықтың ішкі бағасының төмендеуі кезеңінде Азық-түлік корпорациясы фермерлерге астықты интервенциялық сатып алу арқылы тиімді бағамен сатуға көмектеседі, осылайша фермерлердің шығындарын азайтады. Жоғары баға кезеңінде мемлекеттік оператор ұн тарту, мал шаруашылығы, құс шаруашылығы шаруашылықтарына астықты нарықтық бағадан төмен бағамен сатады, осылайша түпкілікті өнім бағасының өсуін тежейді.
Бұл тетік АӨК дамуын ынталандыра отырып, экономикаға мультипликативті әсер етеді, сондай-ақ әлеуметтік маңызы бар азық-түлік тауарларына бағаны тұрақтандыру түріндегі нүктелік әлеуметтік әсер етеді.
Сондай-ақ АШМ астықты үздіксіз экспорттау бойынша шаралар қабылданғанын хабарлады: тасымалдауға 11,8 мыңға жуық астық тасымалдаушы мен 16 мың жабық вагон тартылды. ҚТЖ 10 ай ішінде 7,9 млн тонна астық жүктерін тасымалдады, оның 1,9 млн тоннасы ел ішінде және 6 млн тоннасы экспортқа жөнелтілді.
