Үкімет АӨК қолдауға резервтен 31 млрд теңге бөлмек

Үкімет Азық-түлік корпорациясының жарғылық капиталын толықтыру үшін резервтен 31 млрд 375 млн теңге бөлуді көздеп отыр. Ауыл шаруашылығы министрлігі "Ашық НҚА" порталында қаулының тиісті жобасын әзірлеп, орналастырды.

Қаражат ҚР Президентінің тапсырмасы бойынша ауа райының қолайсыздығынан зардап шеккен ауыл шаруашылығы өндірушілерін қолдауға қатысты бөлінетін болады.

Ауыл шаруашылығы министрлігінің қаулы жобасына берген анықтамасында ағымдағы жылы аграрлар жазғы кезеңдерде құрғақшылықпен, сондай-ақ тамыз-қыркүйек айларында қатты жаңбырмен байланысты бірқатар проблемаларға тап болғандығы атап өтілген. Бұл дақылдардың жай-күйіне және жиналған дақылдың сапасына әсер етті.

Қазіргі уақытта аграрлар сапасыз астықтың нарықтық бағасының төмендігі, 2023 жылғы егіннің ауыл шаруашылығы өнімінің талап етілмеуі, кондициялық емес астықты өткізу нарықтарының болмауы, міндеттемелерді уақтылы орындамау қаупі сияқты өткір проблемаларға тап болып отыр. Бұл жағдай фермерлердің қаржылық жағдайына теріс әсер етті, бұл 2024 жылы егіс науқанын жүргізуге қауіп төндіруде.

9 қазанда экономиканы жаңғырту мәселелері жөніндегі мемлекеттік комиссияның отырысында премьер-министр Әлихан Смайылов 350 мың тонна астықты 4-класты бидай үшін 105 мың теңге, 5-класты бидай үшін 90 мың теңге, класқа жатпайтын бидай үшін 70 мың теңге бағамен тікелей сатып алуды жүзеге асыруды тапсырды.

Осыған байланысты "Азық-түлік корпорациясының" жарғылық капиталын ұлғайту туралы шешім қабылданды.

"2023 жылы көзделген шұғыл шығындарға Қазақстан Республикасы Үкіметінің резервінен бюджет қаражатын бөлу фермерлерге 2023 жылғы егін жинау жұмыстарымен байланысты шарттық міндеттемелерді орындауға және оларды 2024 жылғы егіс науқанын жүргізу үшін қажетті қаржы ресурстарымен қамтамасыз етуге мүмкіндік береді", - деп есептейді Ауыл шаруашылығы министрлігінде.