АШМ фермерлердің бір бөлігі үшін ТЖ залалын өтеуге өтінімдерді қабылдау ұзартады

Ауыл шаруашылығы министрлігі ТЖ кезінде тұқымдар мен инкубациялық жұмыртқаларын жоғалтқан фермерлерге залалды өтеуге өтінімдерді қабылдау мерзімін ұзартады. Ауыл шаруашылығы саласындағы табиғи сипаттағы төтенше жағдай салдарынан жеке және заңды тұлғаларға келтірілген залалды өтеу қағидаларына тиісті түзетулер енгізу жоспарлануда.

Ауыл шаруашылығы өндірушілерінің барлық санаттары үшін өтінімдерді қабылдау табиғи сипаттағы төтенше жағдай туындаған күннен бастап 60 күнтізбелік күн ішінде жүзеге асырылады. Бұл ретте, түзетулерге сәйкес, 2024 жылы ауыл шаруашылығы дақылдары мен инкубациялық жұмыртқалардың бүлінген тұқымдары үшін залалды өтеуге өтінімдерді қабылдау осы жылдың 1 желтоқсанына дейін жүзеге асырылады.

Бүлінген тұқымдар үшін залалды өтеу туралы өтінімдерді қарау кезінде өсімдік шаруашылығы саласындағы комиссия мүшелері тұқымдарды есепке алу журналынан, сондай-ақ байқау журналынан деректерді қосымша зерделейді. Табиғи сипаттағы ТЖ нәтижесінде келтірілген залалды комиссия дақылдарды өсірудің технологиялық картасына сәйкес бір гектарға нақты ауыл шаруашылығы дақылын өсіруге арналған шығыстарды негізге ала отырып, сондай-ақ ресми статистика деректеріне сәйкес тұқымдардың нарықтық құны негізінде айқындайды.

Егер фермер субсидия алушы болып табылса, онда залал мөлшері алынған субсидиялар сомасын шегергенде айқындалады.

Бүлінген ауыл шаруашылығы дақылдарының тұқымдары үшін залал мына формула бойынша анықталады: С = К*Н– s, мұнда:

• С - залал мөлшері, теңге;
• К - бүлінген тұқымдардың саны, тонна;
• Н - ауыл шаруашылығы дақылдары тұқымдарының нарықтық құны, тоннасына теңге;
• S - сатып алынған бүлінген ауыл шаруашылығы дақылдарының тұқымдары үшін алынған субсидиялар сомасы, тиісті жыл үшін, теңге

Инкубациялық жұмыртқалардың жоғалғаны үшін залалды өтеу инкубациялық жұмыртқалардың сатып алынғанын растайтын және инкубациялық процесті растайтын құжаттар болған кезде бюджеттен тыс қаражат есебінен жүзеге асырылады. Сондай-ақ, инкубациялық жұмыртқаларды жою туралы акт қажет болады.