Азық-түлік корпорациясы ұн тартушыларға 120 мың тонна астық сатуда

Осы жылдың наурыз-шілде айлары аралығында Азық-түлік корпорациясы ұн тарту кәсіпорындарына 120 мың тонна астық сатады. Бүгінгі таңда шамамен 8,6 мың тонна жөнелтілді. Бұл туралы Азық-түлік корпорациясының баспасөз қызметі хабарлады.

Әлеуметтік нан бағасын тұрақтандыру жөніндегі шаралар туралы меморандумдар Жамбыл, Қарағанды, Атырау, Ақмола, Түркістан, Жетісу, Ұлытау, Шығыс Қазақстан облыстары мен Шымкент қаласының әкімдіктерімен жасалды. Осы келісімдер шеңберінде бірқатар өңірлер бойынша 9,7 мың тонна астық жеткізуге уағдаластыққа қол жеткізілді.

Форвардтық сатып алу бағдарламасы бойынша ағымдағы жылы Азық-түлік корпорациясы 21,2 млрд теңге бөлді және жалпы сомасы 20,3 млрд теңгеге өтінімдер қаржыландырылды. Осылайша, қазіргі уақытта 280,1 мың тонна ауыл шаруашылығы өніміне келісімшарт жасалды.

Биыл Азық-түлік корпорациясы алғаш рет Қызылорда облысының ауыл шаруашылығы өндірушілерінен 1,2 млрд теңгеге 6 мың тонна көлемінде күріш жармасын форвардтық сатып алды.

Тауарлық несиелердің бағыты бойынша 500 мың тоннадан астам астыққа өтінімдер мақұлданды. Қалған келіп түскен өтінімдер қаралып, облыстардың үйлестіру кеңестеріне бекітуге жіберілді.