Мамыр айында Қазақстанда жылы ауа райы күтіледі, жауын-шашын мөлшері климаттық нормаға жақын болады деп болжануда. Бұл туралы Қазгидромет ұсынған келесі айға арналған консультативтік болжамда айтылған.

Мамыр айында жоғары температуралық фоны бар күндер басым болады: республиканың солтүстік жартысында күндіз ауа +25+35°C дейін, оңтүстік жартысында +30+40°C дейін жылынуы мүмкін.

Сонымен қатар, суық толқындары да болжанады, оның барысында солтүстік, шығыс және орталық аймақтарда, сондай-ақ елдің оңтүстік-шығысындағы таулы аймақтарда температура түнде -5+5°C дейін, күндіз +10+15°C дейін төмендейді. Қазақстанның батысында және оңтүстік жартысында - түнде +5 + 15°C дейін, күндіз +16 + 26°C дейін.

Бір айдағы орташа ауа температурасы республиканың басым бөлігінде нормадан 1-2° жоғары, еліміздің батыс өңірлерінде нормаға жақын болады деп күтілуде.

Мамыр айында жауын-шашын мөлшері республиканың басым бөлігінде нормаға жуық, елдің қиыр батысында нормадан көп, Қазақстанның оңтүстік, орталық өңірлерінде нормадан аз болады деп болжанады.