ШҚО-да жылына 1 мың жаңбырлатқыш машина өндірісі іске қосылады

ADAM компаниялар тобы 2024 жылы SU BEREKE брендімен алғашқы отандық дөңгелек типті жаңбырлатқыш машиналар өндірісін бастады. Бүгінгі таңда 30 машина шығарылды, оның 7-і Шығыс Қазақстан облысының егістіктеріне жиналды. Биыл ADAM машиналардың жаппай өндірісін жолға қоюды жоспарлап отыр, деп хабарлады ҚР АШМ баспасөз қызметінде.

"Бірінші тоқсанда Шығыс Қазақстан облысының аумағында SU BEREKE маркалы жаңбырлатқыш машиналарын шығаратын екінші зауыт іске қосылады. Жаңа зауыттың өндірістік қуаты жылына 1000 жаңбырлатқыш машинаны құрайды. Осылайша, бұл жоба шетелдік техника өндірушілеріне тәуелділікті азайтуға мүмкіндік береді, кепілдік және сервистік қызмет көрсету қарастырылған", - деп хабарлады Ауыл шаруашылығы министрлігінде.

Жоба суару мәселесін және қолжетімді техниканың жетіспеушілігін шешуге бағытталған: жаңбырлатқыштар суды егістіктерге біркелкі таратуға мүмкіндік береді, оның шығынын 30-40%-ға азайтады.

Қазақстанда сатудан басқа, өнімдер Орталық Азия мен ТМД нарықтарына да бағдарланатын болады.