Екі шетелдік компания Қазақстанда ауыл шаруашылығы өнімдерін қайта өңдеу саласындағы жобаларды іске асыруды бастады. Қытайлық Wanlin Group Limited компаниясы Жамбыл облысында сусыздандырылған көкөністер шығаратын зауыт, ал түрік Arbel - Қостанай облысында бұршақ дақылдарын өңдейтін зауыт салуға ниетті. Бұл туралы ҚР Ауыл шаруашылығы министрлігінің баспасөз қызметі хабарлады.
Ауыл шаруашылығы министрі Ербол Қарашөкеев шетелдік инвесторлармен кездесіп, олармен болашақ кәсіпорындардың егжей-тегжейін талқылады.
Wanlin Group Limited компаниясының президенті Ли Янтаомен әңгіме барысында Жамбыл облысы Қазақстанда пияз өндірісі бойынша көшбасшы болып табылатыны атап өтілді. Сусыздандырылған көкөністерді өндіру бойынша жобаны бес жыл ішінде үш кезеңде жүзеге асыру жоспарлануда, инвестициялардың жалпы көлемі 30 млн долларды құрайды. Инвестор Жамбыл облысының үш ауданында пиязды пилоттық отырғызып үлгерді, егінді сынау нәтижелері күтілуде.
Ауыл шаруашылығы министрлігі Wanlin Group Limited компаниясының ҚХР-да сусыздандырылған көкөністер өндіретін екі ірі зауыты бар екенін атап өтті. Өнімдер негізінен АҚШ пен Еуропаға экспортталады. Компания Nestle, Unilever, Kerry және басқалары сияқты ірі серіктестермен ынтымақтастықта.
Сонымен қатар, Қостанай облысында мамыр айының ортасында бұршақ дақылдарын қайта өңдеу зауыты ашылады. Arbel компаниясының төрағасы Хусейн Аслан өндірістің күтілетін жылдық қуаты шамамен 170 мың тонна бұршақ, қызыл және жасыл жасымық, ноқат және қатты сұрыпты бидайды құрайтынын атап өтті. Бірінші кезеңдегі инвестиция көлемі - 8,5 млн доллар. Кәсіпорында шамамен 70 адам жұмысқа орналасады
Қазіргі уақытта технологиялық жабдықты монтаждау, сондай-ақ тиісті рұқсат құжаттарын алу жүргізілуде.
АШМ басшысы аталған кәсіпорын іске асырылғаннан кейін түрік компаниясы астықты терең өңдеу жобасын қарастыра алатынын атап өтті. Бұл бағыт бүгінде Қазақстанның әлемдегі жоғары сапалы астық өндіруші ел ретіндегі позициясын ескере отырып, перспективалы бағыттардың бірі болып табылады.
"Шетелдік инвесторлардың қазақстандық ауыл шаруашылығы мақсатындағы жерлерге үміткер еместігін, жобаларды іске асыру бойынша жұмыстар отандық фермерлермен кооперацияда құрылып жатқанын атап өту маңызды", - деп мәлімдеді Ауыл шаруашылығы министрлігі.
