Қазақстанда консервіленген балық өндірісі іске қосылады

2025 жылы Алматы облысында балық өнімдерін қайта өңдеу жобасын іске асыру басталады. Инвестор Sea Value PLC тай компаниясы болады, деп хабарлады Ауыл шаруашылығы министрлігінің баспасөз қызметі.

"Шикізатты қазақстандық және ресейлік балық шаруашылықтары жеткізетін болады. Өндіріс қуаттылығы күніне 3-5 тонна балық өнімін құрайды. Дайын өнім Таиландқа және басқа елдерге экспортталады. Алдағы уақытта компания үй жануарларына арналған азық-түлікті, тауық ақуызын, тауық, балық, пісте және бадам сүтінен жасалған мұздатылған жартылай фабрикаттарды және т.б. қоса алғанда, ҚР аумағында өндірілетін өнім желісін кеңейтуді жоспарлап отыр", - деп хабарлады АШМ-де.

Сондай-ақ, ведомствоның мәліметінше, компания қазақстандық дистрибьютормен серіктестікте Алматы облысында өңірлік логистикалық хаб құру бойынша жұмыс жүргізуде. Хаб компания өнімдерін ЕАЭО және Орталық Азия нарықтарына импорттауға, сақтауға және таратуға арналған.

Sea Value Plc. Таиландта консервіленген тунецтің екінші ірі өндірушісі болып табылады және әлемнің 150 еліне өнім экспорттайды.