Павлодар облысының аграрлық саласында 2023 жылы 28 млрд теңгеге жеті жобаны іске асыру жоспарлануда. Бұл ретте 103 тұрақты жұмыс орны құрылады. Жобалардың бірі - күркетауық етін өндіруді кеңейту. Бұл туралы облыстық ауыл шаруашылығы басқармасынан хабарлады.
Павлодар ауданында "Turkey PVL" ЖШС құс фабрикаларын кеңейту жоспарлануда, бұл жобаға 400 млн теңге инвестицияланады. Кәсіпорынның қуаттылығы жылына 8 мың тонна күркетауық етін құрайды.
Сонымен қатар, ағымдағы жылы өңірде үш сүт-тауар фермасы салынады. Павлодар ауданында Andas ШҚ құны 8 млрд теңгені құрайтын 1 200 бас ІҚМ арналған СТФ іске қосады. Ферманың қуаттылығы жылына 10 мың тонна сүтті құрайды. "Кронос Павлодар" ЖШС Ақсу маңында құны 12 млрд теңгені құрайтын 1 893 басқа арналған СТФ іске қосады. Қуаттылығы жылына 12 мың тонна сүтті құрайды. "БИК" ЖШС Өспен ауданында құны 4,7 млрд теңгені құрайтын 515 ірі қара мал фермасын салады. Кәсіпорынның қуаттылығы жылына 3,2 мың тонна сүтті құрайды.
Бұдан басқа, облыста құны 1,4 млрд теңгені құрайтын 20 мың тоннаға екі көкөніс қоймасын ("Агата" ШҚ (Ақсу); құны 500 млн теңгені құрайтын 9 мың тоннаға "Ақтоғай Агро" ЖШС (Ақтоғай ауданы) салу жоспарлануда.
Сондай-ақ, Ақкөл ауданында мың басқа арналған "Ертіс су" ШҚ бордақылау алаңы пайда болады. Жобаның құны - 1 млрд теңге.
