Түркістан облысында ауыл шаруашылығы техникасының өндірісі іске қосылады

Түркістан облысының Сауран ауданындағы өндірістік парк аумағында жаңбырлату жабдықтары мен ауыл шаруашылығы техникасын өндіру жобасы іске асырылуда. Өндірістің бір бөлігі қазірдің өзінде іске қосылған. Бұл туралы аймақ әкімдігінің баспасөз қызметі хабарлады.

Жалпы құны 11,5 млрд теңге болатын жобаны BNK Group LTD компаниясы бірнеше кезеңде іске асыруда. Бірінші және екінші кезеңдерде спринклер жабдықтарын шығару жолға қойылды, бұл өндіріске 4,05 млрд теңге салынды. Жобалық қуаты жылына 950 бірлік жабдықты құрайды. Техника американдық технология негізінде жасалады.

Қазіргі уақытта BNK Group LTD жобаны іске қосудың үшінші кезеңіне қарқынды дайындалуда. Мұнда ауыл шаруашылығы техникасы мен тракторлар шығару жоспарлануда. Инвестиция сомасы - 7 млрд теңге. Қазір өндірісте 50 жергілікті тұрғын жұмыс істейді.

Компанияның өндірісін бастау үшін Сауран ауданындағы өнеркәсіп паркінің аумағында учаске бөлінді.

"Түркістан маңында өндірістік парк жұмысын бастады. Өз тарапымыздан біз инфрақұрылымды, браунфилдті кәсіпкерлерге, инвесторларға ұсынамыз. Жұмыс орындарын ұлғайтуға басымдық беріледі", – деп атап өтті облыс әкімі Дархан Сатыбалды.