АШМ жеңілдетілген қаржыландырумен инвестициялық жобалар пулын кеңейтеді

Қазақстанда АӨК-де ірі инвестициялық жобаларды іске асыру бойынша Солтүстік Қазақстан облысының тәжірибесі тарала бастады. Осы бағдарламаны іске асыруға республикалық бюджеттен сүт-тауар фермаларының жылдық құрылысының 2,5% қаржыландыру үшін 100 млрд теңге бөлінетін болады. Алдағы уақытта басқа да жобалар қаржыландырылады. Бұл туралы үкімет отырысында Ауыл шаруашылығы министрі Ербол Қарашөкеев мәлімдеді.

"Алдағы уақытта құс еті, қарқынды суару, қоймалар, аквамәдениет бойынша инвестициялық жобалар пулын ұлғайту жоспарлануда. Қаржыландыруға қосымша қажеттілік 2024-2025 жылдарға 300 млрд теңгені құрайды", - деді АШМ басшысы.

Сондай-ақ, негізгі азық-түлік тауарлары бойынша импортты алмастыру шеңберінде 2026 жылға дейін құны 2,8 трлн теңге болатын 900 инвестициялық жобаны іске асыру жоспарлануда. Оның ішінде ағымдағы жылы 536,2 млрд теңге сомасына 291 жобаны іске асыру жоспарланған.

"АӨК өнімдерін өндіру көлемін ұлғайту үшін қуаттылығы жылына 373 мың тонна сүтті құрайтын 57,6 мың басқа арналған 65 сүт-тауар фермасын, қуаттылығы тәулігіне 1000 тонна майлы тұқымдарды қайта өңдейтін май экстракциялық зауытын және қуаттылығы 6,4 мың тонна қызанақ өсіретін жылыжай кешенін, құс етін өндіру бойынша 10 жобаны және етті қайта өңдеу бойынша 8 жобаны іске асыру жоспарлануда", - деді Ербол Қарашөкеев.