Қазақстан өңірлерінде жүн мен теріні дайындау пункттері ашылады

Қазақстанда алдағы бес жыл ішінде әрбір өңірде жүн мен теріні жинайтын сервистік-дайындау орталықтары құрылатын болады. Оларды қайта өңдеу үшін елде жаңа кәсіпорындарды іске қосу жоспарлануда.

Ауыл шаруашылығы министрлігі 2024-2028 жылдарға арналған ауыл шаруашылығы өнімдері мен тамақ өнеркәсібін қайта өңдеуді дамыту жөніндегі іс-шаралардың кешенді жоспарының жобасын әзірледі. Оның ішінде жалпы қуаттылығы жылына кемінде 5 млн дана тері болатын ауыл шаруашылығы жануарларының терісін қайта өңдеу бойынша кемінде бес инвестициялық жобаны іске қосу көзделеді. Сондай-ақ, жыл сайын жалпы қуаты 25 мың тоннадан кем емес жүнді қайта өңдеу бойынша кемінде бес жоба енгізілетін болады.

Ауыл шаруашылығы жануарларын бірдейлендірудің жаңа цифрлық платформасын әзірлеу кезінде тері сапасын қамтамасыз ету үшін жануарлардың эктопаразиттері мен тері ауруларына қарсы ветеринариялық-санитариялық іс-шараларды жүргізуді бақылауды күшейту тетіктері көзделетін болады. Сатуға арналған жануарларды аулада союға тыйым салу туралы талаптың сақталуын қадағалау күшейтіледі.

Бұдан басқа, 2024-2028 жылдар ішінде Қазақстанда жыл сайын жалпы қуаты жылына 100 мың тонна ет өңдеу бойынша кемінде 20 инвестициялық жоба іске асырылатын болады.

Сондай-ақ қой шаруашылығы бойынша субсидиялаудың жаңа түрлерін әзірлеу және енгізу жоспарлануда:

• жыл бойы жас қой етін өндіру технологиясын енгізгені үшін;
• асыл тұқымды негізгі қошқарлар мен сынамалы қошқарларды ұстағаны үшін;
• қой шаруашылығындағы селекциялық-асыл тұқымдық жұмысты субсидиялаудың сараланған нормативтерін әзірлеу және енгізу.