ҚР Ауыл шаруашылығы министрі Айдарбек Сапаров құрамына етті мал шаруашылығы саласының өкілдері кіретін жұмыс тобын құруды тапсырды. Топтың негізгі мақсаты Ауыл шаруашылығы министрлігімен саланы дамыту мәселелері бойынша жедел өзара іс-қимыл жасау болады, деп хабарлады ведомствоның баспасөз қызметі.
Етті мал шаруашылығын дамытудың проблемалық мәселелерін Айдарбек Сапаров ІҚМ тұқымдары жөніндегі республикалық палаталардың өкілдерімен кездесуде талқылады.
"Мал шаруашылығы еліміздің АӨК негізгі салаларының бірі болып табылады. Оның үлесіне ауыл шаруашылығының жалпы өнімінің шамамен 40%-ы тиесілі. Сала тұрақты қарқынмен дамып келеді. Сонымен қатар, біз бүгін талқылап, оларды шешу жолдарын әзірлеуіміз қажет бірқатар мәселелер бар. Жалпы, ІҚМ басының тұрақты өсуі байқалады. 2024 жылдың 10 айының қорытындысы бойынша өсім 120,6% құрады. ІҚМ жалпы саны 8,2 млн басты құрайды, оның ішінде ет және ет–сүт бағыттары - 4 млн. астам. Сиыр еті 313,8 мың тонна өндірілді, өсімі 106,2%. Біз өз қажеттіліктерімізді 101% қанағаттандырамыз", - деді Айдарбек Сапаров.
Сонымен қатар, министр етті мал шаруашылығының дамуын тежейтін бірқатар проблемалар бар екенін атап өтті. Сала өкілдері шешуді талап ететін бірқатар өзекті мәселелерді және жағдайды жақсарту бойынша ұсыныстарды айтты. Олардың қатарында айналым қаражатының жетіспеушілігі, ет экспортының логистикасы, салық салу мәселелері, цифрлық құралдарды дұрыс есепке алу және қолдану қажеттілігі, шаруашылықтарды экспорттаушылар тізіліміне енгізу және басқалар бар.
