Қазақстанда 2025 жылы 2,1 млн га алаңда табын шегірткелерінің таралуы болжануда. Жағдайды бақылау және уақтылы өңдеу үшін 5 мың адамды тарта отырып, 38 млн га жерді зерттеу жоспарлануда. Бүрку техникасының саны 443-ке дейін артады. Жергілікті жерлерде жұмысты үйлестіру үшін барлық облыстарда жедел штабтар құрылады. Бұл туралы Ауыл шаруашылығы министрлігінің баспасөз қызметі хабарлады.
Ауыл шаруашылығы министрлігінде өткен кеңесте фитосанитариялық қауіпсіздікті қамтамасыз ету талқыланды. Ауыл шаруашылығы вице-министрі Ермек Кенжеханұлының айтуынша, 2024 жылы шегірткелерге қарсы қорғау шаралары 3,1 млн га алқапта өткізілген. Химиялық өңдеулерге 423 бірлік бүрку техникасы жұмылдырылды, 2500-ден астам адам аудандарды зерттеумен айналысты. Бұл шаралар ауылшаруашылық дақылдарының зақымдануын және шегіртке зиянкестерінің көрші мемлекеттердің іргелес аумақтарына қоныс аударуын болдырмауға мүмкіндік берді.
Сондай-ақ, 2024 жылы Түркістан облысында пилоттық режимде шегіртке зиянкестерімен күресу үшін дрондар пайдаланылды, жоба тиімділігін көрсетті. Осыған байланысты инвестициялық субсидиялау қағидаларына фермерлерге сатып алынған агродрондар мен жер үсті бүріккіштері құнының 25% өтем алуға мүмкіндік беретін өзгерістер енгізілді. Агродрондарды "ҚазАгроҚаржы" АҚ арқылы 5%-бен ауыл шаруашылығы техникасын сатып алуға жеңілдікті лизинг бағдарламасына енгізу бойынша жұмыстар жүргізілуде.
Бұдан басқа, үкімет резерві есебінен 53 дрон (мониторинг үшін 7, өңдеу үшін 46), сондай-ақ инспекторлар үшін 68 автомобиль сатып алынды.
Бұдан басқа, "Гарыш Сапары" Ұлттық компаниясымен бірлесіп FitoSpace бірыңғай автоматтандырылған ақпараттық жүйесі енгізілуде.
"Қорғаныс шараларына мұқият дайындалу керек. Аудандарды зерттеумен айналысатын адамдардың саны екі есеге артады. Олардың сапалы жұмысын үйрету және қамтамасыз ету қажет. Мердігерлік ұйымдарда жеткілікті мөлшерде бүрку техникасы болуы керек. Мәселе ерекше бақылауда", - деп атап өтті Ауыл шаруашылығы министрі Айдарбек Сапаров.
