Қостанай облысында субсидия алуға өтінімдерді қарау былыққа толы

Қостанай облысының прокуратурасы ауыл шаруашылығы өндірушілерін субсидиялау жөніндегі өтінімдерді қарау кезінде ауыл шаруашылығы және жер қатынастары басқармасының қызметіндегі былықты анықтады. Бұл туралы прокуратураның баспасөз қызметі хабарлады.

"Өңірде агроөнеркәсіптік кешенді субсидиялауға 3,3 млрд теңге бөлінген, бұл ретте 865 кәсіпкердің өтінімдері 2023 жылғы мамырдан бастап қаралмай қалған, ал қызмет көрсету мерзімі 14 жұмыс күнін құрайды. Облыс прокуратурасы енгізген қадағалау актісі бойынша бұзушылықтар жойылды, облыс әкімдігі өңірдің 757 ауыл шаруашылығы өндірушілеріне 3,3 млрд теңге сомасына субсидиялар төледі", - деп хабарлады қадағалау ведомствосында.

Мұндай фактілерді болдырмау үшін басқарма бұдан былай мемлекеттік қолдау өтінімдерін уақтылы қарау бойынша ұйымдастырушылық-өкімдік шаралар қабылдады.