Ресей Қазақстаннан ет жеткізуге шектеулерді ішінара алып тастады

Қазақстан мен Ресей ауыл шаруашылығы өнімдерін жеткізуге өзара шектеулерді біртіндеп алып тастауда. 30 қаңтарда өткен екі елдің премьер-министрлерінің келіссөздерінде тараптар Ресей Федерациясына ет және ет өнімдерін жеткізуді ұлғайту туралы, сондай-ақ Ресей аумағы арқылы Еуропаға астық жеткізуді арттыру туралы келісті. Бұл туралы келіссөздер қорытындысы бойынша ҚР Ауыл шаруашылығы вице-министрі Азат Сұлтанов мәлімдеді.

"Қазақстандағы эпизоотиялық жағдайға байланысты Ресей тарапы бұған дейін ет өнімдерін әкелуге шектеулер енгізген болатын. Бүгін біз ресейлік әріптестерімізбен келісіп, оңтүстік және оңтүстік-шығыс аймақтарға қатысты бұл шектеуді алып тастадық. Қазір біз Қазақстанның барлық аумағынан шектеулерді алып тастау бойынша жұмыс істеп жатырмыз", - деген Азат Сұлтановтың сөзін дәйектейді Қазақстан үкіметінің баспасөз қызметі.

Сондай-ақ, Азат Сұлтановтың айтуынша, Қазақстан Ресей аумағы арқылы Еуропа елдеріне бидай мен басқа да ауыл шаруашылығы өнімдерін жеткізуді ұлғайтуға ниетті. Оның ішінде, Италияға қатты бидай жеткізу туралы сөз қозғалады.

Сонымен қатар, тараптар Қазақстанда тұқымдық материал өндірісін ашу бойынша бірлескен жұмыс туралы келісті. Бұл қазақстандық фермерлерді отандық тұқыммен қамтамасыз етуге мүмкіндік береді.