Қаржы мониторингі агенттігінің Қостанай облысы бойынша департаментінің қызметкерлері Ресейден автомобиль көлігімен астықтың "сұр" импортымен айналысатын адамдар тобының қылмыстық әрекетін әшкереледі. Бұл туралы ҚМА баспасөз қызметі хабарлады.
Ведомствоның мәліметінше, әкелінетін астық көлемі азайған.
"Аталған тұлғалар 2021-2022 жылдар кезеңінде Өзбекстан Республикасына 500 млн теңгеден астам сомаға 4,8 мың тонна көлемінде ресейлік астық экспорттады. Астық экспорты кезінде халықаралық транзиттік тарифті төлеуден жалтару мақсатында оның отандық шаруа қожалықтарының жалған шот-фактураларын пайдалану арқылы қазақстандық өндіріс екенін көрсетті", - деп хабарлады баспасөз қызметі.
Заңсыз схеманы пайдалану нәтижесінде Қазақстан 88 млн теңге көлемінде транзиттік тариф алмағаны атап өтілді.
Аталған топқа қатысты сотқа дейінгі тергеу жүргізілуде.
