Атырау облысының мектеп асханалары жергілікті өнімдерді пайдаланатын болады

Жаңа оқу жылынан бастап кәсіпкерлер мектеп асханаларының мәзірінде жергілікті ауыл шаруашылығы өндірушілерінің өнімдерін пайдалануды жоспарлап отыр. Бұл туралы «Атамекен» Ұлттық кәсіпкерлер палатасында хабарлады.

Бұған дейін мектеп асханаларын жалға алушыларды біріктірген Catering Atyrau Қауымдастығы Атырау облысының кәсіпкерлер палатасына жергілікті аграрлармен өзара іс-қимыл жасауды сұраған болатын. Кездесуде Қауымдастық төрағасы Айгүл Елеусінова бүгінгі күнге дейін кәсіпкерлердің әрқайсысы мектеп мәзірін азық-түлікпен қамтамасыз етумен өз бетінше айналысқанын айтты. Енді олар бұл мәселені жүйелеуге ниетті.

«Біздің бұйрықтарымызда жергілікті тауар өндірушілермен азық-түлік жеткізуге келісім-шарттар жасасқан жөн болатыны айтылған. Қауымдастық болмаған кезде әрбір жалға алушы осы мәселелермен жеке айналысқан. Негізінен, кәсіпкерлер базарлардан сатып алды, бірақ мәселе көбінесе саудагерлерде өнімге сертификаттардың жоқтығында. Сондықтан біз жергілікті ауыл шаруашылығы өндірушілерімен байланыс орнату үшін кәсіпкерлер палатасына жүгіндік. Өкінішке орай, бүгінгі күні біз аграрларымыздың қандай өнім және қандай көлемде өндіретіні туралы ақпаратқа ие емеспіз және аймақтық палатаның бізге көмектесуін қалаймыз. Егер біз шарттарға қанағаттансақ, онда біз ауыл шаруашылығы өндірушілерімен тікелей шарт жасасуға дайынбыз», - деп атап өтті Айгүл Елеусінова.

Кездесу барысында жергілікті шаруа қожалықтарының өкілдері өндірілетін өнімнің ассортименті мен көлемі туралы айтып берді. Өңірде мектеп асханаларын жалға алушыларға қажетті ауыл шаруашылығы тауарларының барлық тізімі бар.

Кәсіпкерлер палатасының өкілдері тараптардың өзара іс-қимылына қажетті көмек көрсетуге дайын екендіктерін білдірді.

«Біз фермерлермен бірлесіп ынтымақтастық шарттарын талқылауға дайынбыз. Неліктен бізде бәрі бола тұра әкелінетін өнімді сатып алуымыз керек. Мысалы, біз сүтті рұқсат етілген үлкен контейнерлерде сатып алуға дайынбыз. Фермерлер үшін сүтті литрлік қораптарға салу қымбат, бірақ бізге олар қажет емес, өйткені біз оларды кейін бәрібір тастаймыз. Бізге бір ауыл шаруашылығы өндірушісі келіп, өз бағасын ұсынды, бағасы өте жақсы. Біз бұл жұмысты жүйелеуіміз керек», - деді Айгүл Елеусінова.

Catering Atyrau қауымдастығы шамамен бір жыл бұрын құрылған. Бүгінгі таңда оған қала мен Жылыой ауданынан 12 кәсіпкер кіреді. Құрылғаннан бастап салыстырмалы түрде қысқа мерзімге қарамастан, қауымдастықтың оң нәтижелері бар, оның ішінде барлық мектеп асханаларында мәзірдің бірыңғай бағасын бекіту.