Шымкент кондитерлік фабрикасы экспортты ұлғайтуда

Шымкенттік кондитерлік өнімдерді өндіруші NURTAU Distribution қазақстандық өнімнің экспортын ұлғайтуға ниетті. Бүгінгі таңда зауыт KazakhExport ЭСК сақтандыру қолдауымен Ресей, Өзбекстан және Қырғызстан нарықтарына өнімді экспорттауда. Бұл туралы Сауда министрлігінің баспасөз қызметі хабарлады.

Кәсіпорын ассортиментінде 900-ден астам тауар позициясы бар: шоколад, піспенан, сусындар, сағыз, чипстер, нан және т.б. Ішкі нарықта зауыт 4 мыңнан астам сауда нүктесін өніммен қамтамасыз етеді.

"KazakhExport бізге шетелдік сатып алушыларды табуға және көрші елдердің нарықтарына экспортпен шығуға көмектесті. Қазір біздің мақсатымыз - Қазақстандық өнімді импорттаушы елдердің географиясын кеңейту үшін сату мен экспортты ұлғайту", - деді NURTAU Distribution экспорт бөлімінің менеджері Ернар Қасымов.

Өз кезегінде KazakhExport сақтандыру департаментінің директоры Алмагүл Мәженова 2023 жылдың басынан бері компания 50-ге жуық қазақстандық компанияның экспорттық мәмілелерін қолдағанын атап өтті. Бұл ретте шағын және орта бизнес кәсіпорындарының үлесі шамамен 70% құрады.

"KazakhExport тарапынан тәуекелдерді қабылдау кәсіпорындарды өндірілетін тауарға немесе көрсетілетін қызметке тұрақты сұраныспен қамтамасыз етеді. NURTAU Distribution жағдайында KazakhExport сақтандыру өтемі зауытқа төлемді кейінге қалдыру шартымен өткізілген тауар үшін шетелдік сатып алушыдан төлем алуға сенімділік береді", - деп түсіндірді Маженова.

KazakhExport - "Бәйтерек" ҰБХ еншілес компаниясы. Компанияның негізгі міндеті - түрлі қаржы құралдары арқылы отандық шикізаттық емес экспорттаушыларды қолдау. 2016 жылдан бастап KazakhExport 870 млрд теңгеден астам сомаға 200-ден астам экспорттаушыға қолдау көрсетті.

Қолдау көрсетілетін кәсіпорындар экономиканың тамақ және химия өнеркәсібі, машина жасау, агроөнеркәсіптік кешен, металлургия және т.б. салаларында жұмыс істейді.