Қазақстанда швейцариялық компания Аграрлық қор құруды жоспарлап отыр

INOKS Capital швейцариялық компаниясы Қазақстандағы инвестициялық қызметті кеңейтуге, оның ішінде аграрлық қор құру және инвестициялар туралы келісім жасасу жолымен мүдделі. Бұл туралы компанияның бас директоры Набиль Марк Абдул-Масих ҚР СІМ Инвестициялар комитетінің төрағасы Ғабидолла Оспанқұловпен кездесуде мәлімдеді.

KAZAKH INVEST Ұлттық компаниясының баспасөз қызметінен хабарлағандай, INOKS Capital өкілдері компанияның қолданыстағы инвестициялық жобаларды кеңейту жоспарлары туралы айтып берді. Олардың қатарында қарқынды бақтар құрудың екінші кезеңі, құрама жем зауытын кеңейту, сондай-ақ Жамбыл өңіріндегі қант зауытын жаңғырту бар. Компания шикізатты жергілікті және шетелдік нарықтардан сатып алуды жоспарлап отыр. Жоспарланған инвестициялардың көлемін ескере отырып, компания инвестициялар туралы келісімге қол қою мүмкіндігін қарастыруда.

Ғабидолла Оспанқұлов компанияның жоспарларын қолдап, ҚР премьер-министрінің бірінші орынбасары Роман Склярдың төрағалығымен Инвестициялық штабтың жұмысы туралы айтты.

"Біздің жұмысымыздың бір бағыты шетелдік инвесторларды қолдау болып табылады. Штаб құрылымының арқасында бізде туындайтын барлық сұрақтарға жедел ден қоюдың бірегей мүмкіндігі бар. Штаб қабылдаған шешімдер міндетті болып табылады. Біз сондай-ақ Қазақстанда инвесторлардың жобаларын неғұрлым ыңғайлы сүйемелдеу үшін нормативтік құқықтық базаны жақсарту бойынша тұрақты жұмыс жүргізіп жатырмыз", - деді Ғабидолла Оспанқұлов.

Швейцариялық INOKS Capital компаниясы ТМД және Африка елдерінің дамушы нарықтарының өңдеу секторларында жобаларды іске асыруда. 2020 жылдан бастап компания Қазақстанның аграрлық өнеркәсібінде бірнеше жобаны жүзеге асырды. Олардың ішінде Алматы облысында жеміс бақтарын құру, сондай-ақ "Қорғас-Шығыс қақпасы" АЭА-да құрама жем өндіру зауыты бар. Қазіргі таңда компания Qazaqstan Investment Corporation компаниясымен аграрлық қор құру бойынша келіссөздер жүргізуде.