Қазақстандық өнімдермен стендтер Қытайдың супермаркеттерінде пайда болады

"Ухань Ханьоу" халықаралық логистикалық компаниясы (Wuhan Asia Europe Logistics Co.) Қазақстаннан азық-түлік өнімдерін импорттауға және оларды Қытайдың Хубэй провинциясындағы сауда желілері арқылы сатуға ниетті. Компания ынтымақтастық жөніндегі жоспарларды KazakhExport ұлттық экспорттық сақтандыру компаниясымен меморандумда бекітті. Тараптар қазақстандық өнімді Қытай нарығына жылжыту бойынша іс-шараларды бірлесіп ұйымдастыруға келісті, деп хабарлады KazakhExport.

"Ухань Ханьоу" меморандумына сәйкес қазақстандық өнімдерді Хубэй провинциясының сауда желілерінде тақырыптық бөлімдер арқылы, қазақ ұлттық стилінде мамандандырылған стендтер орната отырып сататын болады. Бұдан басқа, компания қазақстандық тауарлар мен KazakhExport мүмкіндіктерін ел аумағында ілгерілетуде қолдауды қамтамасыз етеді.

Өз кезегінде KazakhExport отандық өндірушілермен байланыс орнатуға және импорттаушыларды қызықтыратын өнімді іздеуге жәрдемдеседі. Сондай-ақ, ұлттық компания қазақстандық экспорттаушылар үшін қажетті сақтандыру мен қаржыландыруды қамтамасыз етеді.

Ағымдағы күні ҚХР-ға май өнімдерін, тамақ өнімдерін, макарон өнімдерін, кондитерлік өнімдерді, сусындар мен басқа да тауарларды жеткізу жөнінде уағдаластыққа қол жеткізілді.

"Стратегиялық құжат Қазақстан мен Қытай компаниялары арасындағы бірлескен жұмыстың тиімділігін арттыруға, тығыз коммерциялық қатынастарды дамытуға және Қытайға дайын қазақстандық өнімнің шикізаттық емес экспортының көлемін ұлғайтуға бағытталған", - деді ҚХР-дағы KazakhExport өңірлік директоры Сергей Салманов.

"Ухань Ханьоу" - Han Xin Ou халықаралық маршруттық пойыздарға арналған ҚХР мемлекеттік теміржол жүк платформасы. Компанияның Хубэй провинциясының ондаған қалаларында заманауи әмбебап дүкендері, сауда орталықтары, супермаркеттері бар, Қытайға импорттау маршрутында өзінің көлік логистикасы және кең тарату желісі бар. Компанияны Ухань Үкіметі субсидиялайды және "Бір белдеу – бір жол" саясатының мүшесі болып табылады.