Жамбыл облысында ауыл шаруашылығы жануарларын бірдейлендіру жұмыстары жүргізілуде. Сиырлар, ешкілер, қойлар мен түйелер мемлекет есебінен бірдейлендіріледі. Жылқыларды чиптеу иелерінің есебінен жүргізіледі, бірақ бұл қызметтің құны 1200 теңгеден 350 теңгеге дейін төмендетілді. Бұл туралы облыс әкімінің баспасөз қызметі хабарлады.
Белсенді түсіндіру жұмыстарының нәтижесінде өңірдің фермерлері таңбалаудың электрондық тәсілін қолдады. Чиптердің арқасында жылқы иелері олардың қозғалысын бақылай алады.
"Жылқыларды чиптеу жүргізілетін Дулат ауылдық округі республикалық тас жолдың бойында орналасқан. Ауыл шаруашылығы жануарларын сәйкестендіру тасжолдардағы ЖКО санын азайтуға көмектеседі және мал ұрлығының алдын алу бойынша пәрменді шара болып табылады. Чиптің құны өте арзан, сондықтан барлығын осы процедураны жүргізуге шақырамын", - деді Шу ауданы фермерлер одағының төрағасы Айтмұхамбет Айтжанов.
Жылқыларды чиптеу бойынша іс-шаралар облыстың барлық аудандарында өткізілетін болады. Өңірде барлығы 173 129 бас жылқы чиптелген.
"Чиптеу жүйесі елде ветеринарлық қауіпсіздікті қамтамасыз ету үшін қажет, мал басын есепке алуға және селекциялық-асыл тұқымдық жұмыстарды мақсатты түрде жүргізуге мүмкіндік береді. Бұл процедура малдың ықтимал ауруларын мүмкіндігінше ертерек анықтауға және жақсы өнім алуға мүмкіндік береді. Сондай-ақ, әр жануарды бақылауға, уақтылы ветеринарлық көмек көрсетуге, жануарлар ауруларының алдын алу және диагностикалау бойынша іс-шараларды жоспарлауға және жүзеге асыруға мүмкіндік береді. Сонымен қатар, заңнама аясында мал өлген жағдайда ауыл шаруашылығы жануарларының иелері өтемақы ала алады, - деп атап өтті облыстық ветеринария басқармасының басшысы Бақыт Бетбаев.
