Қазақстанда фермалар қызметкерлерінің жалақысын субсидиялау ұсынылды

Шығыс Қазақстан облысының фермерлері кәсіби кадрлардың жетіспеушілігіне шағымдануда. Зайсан ауданының шаруа қожалықтарының басшыларының айтуынша, өңірде шопандар, малшылар, механизаторлар, зоотехниктер, жылқы өсірушілер, ветеринарлар табылмайды, деп хабарлады "Атамекен" ҰКП.

Шаруа қожалықтары басшыларының айтуынша, шағын шаруа қожалықтары үшін проблема жалақыда болып отыр. 200 мың теңге жалақы қанағаттандырмайды, ал олар бұдан артық ұсына алмайды.

ШҚО Кәсіпкерлер палатасы Зайсан аудандық филиалының директоры Қанат Әбдіғалиевтің айтуынша, бұл мәселені аудан фермерлері көптен бері көтеріп келеді.

"Осы позицияларда жұмыс істегісі келетіндерді табу қиын, олардың жалақысы да төмен, ал кадрларсыз фермерлер мал басын көбейте алмайды", - деп атап өтті Қанат Әбдіғалиұлы.

Бұған жауап ретінде ШҚО бойынша Қазақстан фермерлер қауымдастығының төрағасы Самат Қыдырмолда агроөнеркәсіптік сектор қызметкерлерін оқыту үшін қысқа мерзімді курстарды енгізу ұсынылып отырғанын хабарлады.

"Арнайы оқу орындарында немесе оқу орталықтарында агроөнеркәсіптік сектор мамандықтары бойынша курстар ашу мәселесі пысықталуда. Курстардан өткені туралы сертификаттар алу міндетті. Алдын ала жұмыс берушімен келісім-шарттар жасасуға болады. Сондай-ақ, мемлекет тарапынан кадрлардың осы санатына ішінара еңбекақы төлеуге субсидиялар төлеу мәселесін көтереміз", - деді Самат Қыдырмолда.

Ол ауыл шаруашылығы қызметкерлерінің санатын қайта қарау, жағдай жасау, әлеуметтік пакетті ойластыру қажет екенін айтты.

"Біз агроөнеркәсіптік сектор саласының қызметкерлері үшін зиянды өндіріс қызметкерлерімен қатар 55 жаста зейнетке шығу мәселесін көтеруді жоспарлап отырмыз", - деді Самат Қыдырмолда.