Қазақстанда 3 қазанда өсімдік шаруашылығы өнімінің өнімділігі мен сапасын арттыруды субсидиялау қағидаларына өзгерістер күшіне енді. Жылыжай шаруашылықтары жылынатын өнеркәсіптік жылыжай кешендері мен фермерлік жылыжайларда өсірілетін қорғалған топырақтағы көкөніс дақылдарының бір дақылдық айналымына маусымаралық кезеңде электр энергиясына, көмірге және газға жұмсалатын шығыстарды субсидиялау арқылы мемлекеттен қолдау ала алады. Бұл туралы Ауыл шаруашылығы министрлігінде хабарлады.
Басым дақылдардың тізбесін және субсидиялау нормативтерін жергілікті атқарушы органдар бекітетін болады.
АШМ ақпараты бойынша, субсидиялар алу кезінде фермерлік жылыжайларға қойылатын міндетті талап өндіріс технологияларына сәйкестік сертификатының (есебінің) болуы болып табылады. Ұлттық стандарт 2023 жылдың 1 мамырынан бастап күшіне енді. Сертификат алудың барлық мәселелері бойынша ҚР МТИ Техникалық реттеу және метрология комитетіне хабарласуға болады.
"Мемлекеттік қолдаудың қосымша шарасы ретінде жылыжай шаруашылықтарына энергия ресурстарына арналған шығыстарды субсидиялау туралы шешімді үкімет 2023 жылдың басында Түркістан облысының фермерлері қалың қардан зардап шеккен кезде қабылдады", - деп атап өтті Ауыл шаруашылығы министрлігінде.
Сондай-ақ, жабық топырақтағы көкөніс дақылдарын өндіруді дамыту үшін тыңайтқыштардың (органикалық), пестицидтердің, биоагенттердің (энтомофагтардың) және биопрепараттардың құнын субсидиялау, суармалы су беру жолымен мемлекеттік қолдау жүзеге асырылады. Бұдан басқа, жылыжай шаруашылықтарына инвестициялық субсидиялау шеңберінде жылыжай кешендерін салу және кеңейту жөніндегі жобаларды іске асыру кезінде шығыстар өтеледі, бұл ретте субсидиялауды жетілдіру бойынша жүргізіліп жатқан жұмыстар шеңберінде өтеуді шығындардың 25% - дан 30% - на дейін ұлғайту бөлігінде өзгерістер енгізіледі.
Сонымен қатар, жаңартылған субсидиялау қағидаларында тұқымға арналған субсидиялар нормативтері орта есеппен 30% - ға ұлғайтылды. Бұл мемлекеттік қолдау шарасы нарықтағы тұқым материалының қымбаттауымен байланысты.
