Тоқаев төрт министрлікті қайта құрды

Қазақстанда мемлекет басшысының жарлығымен төрт министрлік қайта құрылды. Бұл туралы Ақорда хабарлады.

Қазақстан Республикасының Экология және табиғи ресурстар министрлігі одан Қазақстан Республикасының Су ресурстары және ирригация министрлігін бөлу жолымен қайта ұйымдастырылды. Жаңа ведомствоға су қорын пайдалану және қорғау, сумен жабдықтау, су бұру саласындағы функция мен өкілеттіктер беріледі.

Қазақстан Республикасының Индустрия және инфрақұрылымдық даму министрлігі Көлік министрлігі және Өнеркәсіп және құрылыс министрлігі болып бөлінеді.

ҚР Көлік министрлігіне теміржол, автомобиль, ішкі су көлігі; сауда мақсатында теңізде жүзу; Қазақстан Республикасының әуе кеңістігін пайдалану және азаматтық және эксперименттік авиация қызметі; аэронавигация және әуежайлар қызметтері саласындағы табиғи монополиялар; әуежайлар қызметтері саласындағы қоғамдық маңызы бар нарықтар; автомобиль жолдары саласындағы өкілеттіктер ауысады.

Өнеркәсіп және құрылыс министрлігіне индустрия және индустриялық даму; өнеркәсіп; тау-кен металлургия кешені; машина жасау; көмір, химия, жеңіл (ауыл шаруашылығы жануарларының терісі мен жүнін өңдеуден басқа), ағаш өңдеу және жиһаз өнеркәсібі; құрылыс индустриясы және құрылыс материалдарын өндіру; машиналар мен жабдықтардың қауіпсіздігі; сәйкес химиялық өнімдердің қауіпсіздігі салаларындағы функциялар салалық бағыттылығымен ауысады; ерекше тауарларды бақылау; энергия үнемдеу және энергия тиімділігін арттыру және басқалар.

Сондай-ақ, Ақпарат және қоғамдық даму министрлігі Мәдениет және ақпарат министрлігі, ал Мәдениет және спорт министрлігі Туризм және спорт министрлігі болып қайта құрылды.

Жарлық қол қойылған күнінен бастап, яғни 1 қыркүйектен бастап қолданысқа енгізіледі.

Сонымен қатар, мемлекет басшысының жарлығымен Марат Қарабаев - Индустрия және инфрақұрылымдық даму министрі, Дархан Қыдырәлі - Ақпарат және қоғамдық даму министрі, Асхат Оралов - мәдениет және спорт министрі, Зульфия Сүлейменова - экология және табиғи ресурстар министрі қызметтерінен босатылды.

Бүгін президент Қасым-Жомарт Тоқаев Қазақстан халқына жолдауында елімізде су ресурстары және ирригация министрлігі құрылатынын айтты.