Қазақстанның ірі сауда желілері фермерлерден 1,5 мың тонна картопқа тікелей келісімшарт жасауға дайын екендіктерін білдірді. Сонымен қатар, желілер өнімді шаруашылықтардан әкетуді өздері ұйымдастыруға дайын. Бұл туралы Сауда және интеграция министрлігінің баспасөз қызметі хабарлады.
ҚР сауда және интеграция бірінші вице-министрі Айжан Бижанова Ауыл шаруашылығы министрлігінің, әкімдіктердің, сауда желілерінің және әлеуметтік-кәсіпкерлік корпорациялардың өкілдерімен кеңес өткізді. Оның айтуынша, "Магнум", "Смолл", "Анвар" және "Дина" сияқты желілер тікелей келісімшартқа дайын екендіктерін мәлімдеді.
"Әкімдіктер нарықтағы сұранысты жедел қанағаттандыру үшін өз қажеттіліктерін, оның ішінде сауда желілерінің көлемі бойынша ұсынуы қажет. Сондай-ақ жүйе құраушы нарықтарды бақылауды қамтамасыз ету және ауыл шаруашылығы тауарын өндірушілер мен сауда нүктелері арасында тығыз өзара іс-қимылды жолға қою маңызды", - деп атап өтті Айжан Бижанова.
Бұл ретте ол азық-түлік тауарларына баға белгілеу тізбегіндегі делдалдық схемаларды тергеу жөніндегі өңірлік комиссиялардың жұмысын күшейту қажеттігін атап өтті. Сондай-ақ, бірінші вице-министр картоп пен басқа да өнімдерге сату бағасының негізсіз өсуіне жол бермеу үшін ауыл шаруашылығы өндірушілерімен мәселелерді пысықтауды тапсырды.
Жыл басынан бері Сауда комитетінің өңірлік департаменттері өнімсіз делдалдарды анықтау бойынша 20 өңірлік комиссия жүргізді, оларда әлеуметтік маңызы бар өнім ретінде картопқа 15% сауда үстемесін асыра алмау бөлігінде 49 бұзушылық анықталды.
Естеріңізге сала кетейік, картоп экспортының күрт өсуі және оған бағаның өсуі аясында сауда қызметі мәселелері жөніндегі ведомствоаралық комиссия картопты үшінші елдерге алты ай мерзімге экспорттауға тыйым салу туралы шешім қабылдаған болатын. Бұл шара ЕАЭО елдеріне қолданылмайды, алайда осы бағыттағы экспорт бақылауда болады.
