Қазақстанда фермерлерге тауар несиесін беру енгізіледі

Қазақстан президенті Қасым-Жомарт Тоқаев коммерциялық банктердің қатысуымен диқандарға жеңілдікпен несие беруді ұлғайтуды, сондай-ақ жаңа құрал - тауар несиесін беруді енгізуді тапсырды.

"Өткен жылы "Ауыл аманаты" жобасы басталды, жалпы нәтиже жаман емес. Енді осы жоба аясында тағы бір жаңа тәсілді, яғни тауар несиесін беру мәселесін қарастыру қажет. Бұл ретте ауыл тұрғындарына өз өнімдерін өңдеуге және сатуға мүмкіндік беретін инфрақұрылым құру", - деді Қасым-Жомарт Тоқаев Қазақстан халқына Жолдауын айтып.

Ол әр ауданда азаматтарды әртүрлі дақылдарды өсіруге үйрететін орталықтарды іске қосуды тапсырды. Мұндай жоба Жамбыл облысының Меркі ауданында іске қосылды, президент үкімет пен әкімдерге оны басқа өңірлерде масштабтауды ойластыруды тапсырды.

Жалпы, мемлекет басшысы биыл көктемгі егіс жұмыстарын қаржыландыру екі есеге ұлғайтылғанын атап өтті. Бұл ретте АӨК-ні қаржыландыру 70%-ға мемлекет есебінен жүзеге асырылады және салаға коммерциялық банктердің қаражатын тарту қажет.

"Аграрларға төмендетілген мөлшерлеме бойынша несиелер беру үшін мемлекеттік қаржы институттарын субсидиялау бойынша жұмыс жүргізілді. Банктерге қатысты осындай тәжірибені қолдану керек Мұның бәрі шаруаларды айналымға қажетті қаражатпен шұғыл қамтамасыз етуге, сыбайлас жемқорлық қатерін азайтуға және несие алуды оңтайландыруға жол ашады. АӨК-ні тікелей субсидиялаудан қолжетімді несиелендіруді қамтамасыз етуге біртіндеп көшу аса маңызды міндет болып табылады", - деді Қасым-Жомарт Тоқаев.